Eń tártipti júrgizýshi 60 jyldan asa kólik basqaryp, birde-bir ret ereje buzbaǵan, – dep habarlaıdy Polisia.kz.
Lıdııa Sıdorenko 85 jasta, júrgizýshi ótili 61 jyldy quraıdy. Ol jolda ózin tártipti ustaýdyń úlgisi bolyp tabylady – osy ýaqytqa deıin ol birde-bir buzýshylyq jasamaǵan. Osy ýaqytqa deıin barlyǵy tórt avtomobıl basqarǵan: berilis qoraby rýlmen basqarylatyn “Moskvıch-vosmerochka”, Lıdııa Aleksandrovna ony osylaı erkeletip ataǵan, sosyn qyzyl tústi “Moskvıch – 2140”, 1990 jyly ony aqshyl-sary tústi “VAZ-2106” markaly kólikke almastyrǵan. 2011 jyly “Volga” GAZ-24 mashınasy bolǵan, oblys júrgizýshisi ony áli kúnge deıin basqarady.
Júrgizýshi kýáligin Jambyl qalasynda 1959 jyly alǵan, biraq eshbir kólik uıymynda jumys istemegen, uzaq jyldar boıy oblystyq tutynýshylar odaǵynda eńbektengen.
Jergilikti polısııa qyzmeti basqarmasynyń aýmaǵynda Lıdııa Sıdorenkonyń Polısııa departamentiniń bastyǵy Janat Súleımenovpen kezdesýi ótti. Onda qatarlasyp – “Volga”, “Moskvıch”, “Jıgýlı” markaly jeti retromashınalar boı túzedi. Olardyń keıbirin Lıdııa Aleksandrovna jeke ózi basqaryp, polısııanyń jas qyzmetkerlerine kólik basqarý sheberligin kórsetti.
– Kóp jyldar boıy Qazaqstan Respýblıkasynyń zańdaryn jáne jol qozǵalysy erejelerin qatań saqtap, joǵary sanalyq jáne jaýapty azamattyq pozısııa ustanǵanyńyz úshin Sizge shyn júrekten alǵysymdy bildiremin. Azamattarymyzdyń arasynda júrgizýshiler tártibin qalyptastyrýǵa jáne nyǵaıtýǵa qosqan úlesińiz baǵa jetpes. Sizge zor densaýlyq, uzaq ǵumyr, otbasyńyzǵa amandyq pen bereke tileımin! – dedi Janat Súleımenov.
General Lıdııa Sıdorenkoǵa alǵys hat, gúl shoǵy jáne qundy syılyq tapsyra otyryp, yqylasyn bildirdi.
PD basshylyǵyna qamqorlyǵy men yqylasy úshin alǵys aıtyp, Lıdııa Sıdorenko barlyq júrgizýshilerge kelesi sózderin arnady:
– Qurmetti júrgizýshiler! Jol qozǵalysy erejelerin múltiksiz saqtańyzdar, jol ústinde júrgizýshiler retinde bir-birlerińizdi qadirleńizder. Ásirese bul jastarǵa qatysty. Sonda ǵana tártip ornap, jol-kólik oqıǵalary men qaıǵyly oqıǵalar az bolmaq.
Kezdesý, keńestik zamannyń avtomobıl qurylysy tarıhyna kishigirim ekskýrsııamen aıaqtalyp, eń tártipti júrgizýshi 85 jastaǵy Lıdııa Sıdorenko qoıylǵan retroavtomobılder erekshelikteri týraly áńgimelep, is júzinde kólikterdi basqaryp kórsetti.