Qytaı Kommýnıstik partııasynyń úshinshi jabyq plenýmynda sońǵy 30 jyl boıy qoldanysta bolyp kelgen «Bir otbasyna – bir bala» saıasaty qaıta qaraldy. Bul týraly NTD telearnasy habarlady.
Endi aldaǵy ýaqytta qytaılyq erli-zaıyptylardyń bireýi ózi shyqqan otbasynyń jalǵyz perzenti bolsa, onda olarǵa eki bala dúnıege ákelýge ruqsat beriletin kórinedi.
Qytaıda «jalǵyz bala» saıasaty 1980 jyldan beri júrgizilip keledi. Sodan beri bul elde mıllıondaǵan áıel bala kótermeýdiń, ony dúnıege ákelmeýdiń túrli joldaryna júgingen.
«Jalǵyz bala» saıasaty úshin Qytaı bıligi óz halqy tarapynan talaı-talaı syn-eskertpeler estidi. Kóptegen quqyq qorǵaýshylar «jalǵyz bala» saıasaty arqyly Qytaıda adam, onyń ishinde ana men bala quqyǵy buzylyp otyrǵanyn aıtýmen keledi. Tipti, bul saıasatty qylmysqa balaǵandar da tabyldy. Jalpy, kóptegen qytaılyqtar «jalǵyz bala» saıasatyn múlde toqtatý kerek dep esepteıdi.
«Qytaı áıelderiniń quqyǵy» uıymyn qurýshy Chjan Szın degen qytaı áıeli: «Náresteniń týylýǵa qaqy bar, oǵan dúnıege kelý quqyǵyn kompartııa emes, Qudaı beredi. Sábılerdiń ómirge kelý-kelmeýine partııanyń aralaspaýy kerek. Kompartııa kóp jyldan beri osylaısha adam quqyǵyn aıaq asty etip keledi», – depti.
Mamandardyń aıtýyna qaraǵanda, Qytaıda turǵyndardyń tyǵyz ornalasýy eshqandaı másele týdyryp otyrmaǵan kórinedi. Munda tek halyqty durys ornalastyra bilmegendikten týyndaǵan túıtkilder bar. Sondyqtan, Qytaı úshin turǵyndardy durys jaıǵastyra alatyn saıasat kerek.
Búginde Qytaı bıliginiń «jalǵyz bala» saıasatyna qatysty «jumsarǵan kóńiline» qarap kóptegen quqyq qorǵaýshylar el bıligi adam quqyǵyna qurmetpen qaraı bastady degen oı túıýde. Degenmen, Qytaı bıligi ózi túzgen «jalǵyz bala» saıasatyn adam quqyǵyn qorǵaý úshin emes, ekonomıkalyq sebepterge baılanysty ózgerte bastaǵanyn túsingenimiz jón. О́ıtkeni, búginde Qytaı halqy «qartaıyp barady». Sonyń saldarynan aldaǵy ýaqytta Qytaıda jumys kúshiniń tapshylyǵy baıqalýy múmkin. Eger eńbekke jaramdy top azaıyp ketse, ekonomıkalyq turǵyda damý bolmaıtynyn qytaılyq atqa minerler jaqsy túsinip otyr.
Birikken Ulttar Uıymynyń esebi boıynsha 2030 jylǵa deıin Qytaıda 67 mıllıonǵa jýyq jumys qoly azaıady eken.
Qazirden bastap Qytaı ishki demografııalyq jaǵdaıyna muqııat bolmasa, bul salada tepe-teńdik ustamasa, kúrdeli máselelermen betpe-bet kelýi ábden múmkin.
Joldybaı Bazar.