Kóne kólikteri kóz tartady

Jas sýretshi Nurjan Sol­tanbekovtyń negizgi baǵyty keskindeme óneri men grafıka edi. Kádimgi qalamsappen salǵan ıllıýstrasııalyq sýretteri erte­gi kitaptarǵa suranyp-aq tur. Batyrlardy salǵan beınesine qarasańyz, syrt kelbetin kórip qana qoımaısyz, ishki rýhyn da sezingendeı bolasyz. Ár sýretine jaýapkershilikpen qaraıtyn Nurjan atústi júrip, qolyna qaryndash almaıdy. Jaılanyp-tolǵanyp baryp, asyqpaı kirisken jón dep esep­teıdi ózi. Sondyqtan da shy­ǵar, ár jumysy sapaly, tartymdy bolyp shyǵady.

Zamandastary Nurjannyń salǵan sýretterine qarap, ertegi kitaptardyń ıllıýstratory bo­lýǵa ábden laıyq ekenin aıtady. Ras-aý, búginde búldirshinder qyzyǵatyndaı qazaqy sýretter joqtyń qasy. Balanyń sanasyn «Chelovek paýk», «Halk», «Býba» syndy qaıdaǵy joq keıipkerler jaýlap alǵan zamanda ulttyq bolmysymyzǵa jaqyn, óskeleń urpaqqa tárbıe beretindeı kór­nekilikter kerek-aq.

Grafıka, keskindeme janrynda jumys istep júrgen Nur­jan Soltanbekov Semeıdegi №19 mektepke jumysqa ornalas­qan­nan beri aǵashtan retro kólik jasaýdy ermek etip júr.

– Aǵash ónerimen aınalysý oıymda bolǵan emes. Osy mektepke kelgen soń aǵashtan jasalǵan retro kóliktiń shaǵyn maketin kórdim. Aıaqtalmaǵan eken. Ony osy mektepte muǵalim bolǵan bir aǵamyz bastap, keıin qaıtys bolyp ketipti. Sony aıaq­taǵan soń osyndaı maketter ja­saýǵa kiristim, – deıdi jas sý­retshi.

Qazirgi ýaqytta Nurjannyń qorynda retro kólik maketiniń beseýi bar. Jıyrma shaqty ju­mys jınalǵan soń kórme ótki­zýdi de oılastyryp otyr. Ol kóne kólikterdi ǵalamtordaǵy sýretterine qarap jasaıdy eken. Júz paıyz uqsatpasa da mól­sherin keltiredi.

Semeı qalasynyń týmasy Nurjan Soltanbekov kolledj­den soń joǵary bilim alý úshin 2012-2015 jyldary Shákárim atyndaǵy Semeı memlekettik ýnıversıtetine túsip, «Beıneleý óneri jáne syzý» muǵalimi ma­mandyǵyn alyp shyqqan. Búginde Semeıdegi №19 mektepte kórkem eńbek pen beıneleý ónerinen sabaq beredi. Aǵash, grafıka janrynan bólek sándik qoldanbaly ónermen de shuǵyldanady.

Semeı