Ekinshi dúnıejúzilik soǵysta qaza bolǵan jaýyngerlerdiń súıegi araǵa jyldar salyp elge jetkizildi. Izdeý tobynyń jumystary nátıjesinde Ekinshi dúnıejúzilik soǵysy maıdanynda qaza tapqan úsh qazaqstandyqtyń esimi belgili boldy.
Ýkraınadaǵy «Vertıkal» mamandandyrylǵan birlestigi Ekinshi dúnıejúzilik soǵys jyldarynda Ýkraına aýmaǵynda qaza tapqan qazaqstandyq jaýyngerler Qaıyrjan Tikshekeev, Seıd Toınashev pen О́ksikbaı Bazarbaevtyń súıekterin tapty.
Nur-Sultan qalasyndaǵy Qarýly Kúshterdiń áskerı-tarıhı murajaıynda Qaıyrjan Tikshekeevtiń súıegin týystaryna tapsyrý rásimi ótti.
Altyburyshty medalonǵa salynǵan qaǵaz tósenish jaýyngerdiń jeke basyn anyqtaýǵa múmkindik berdi. Qaıyrjan Tikshekeev 1916 jyly Soltústik Qazaqstan oblysy Aıyrtaý aýdanynda dúnıege kelgen. Sol jerden ol maıdanǵa attanyp, 1941 jyly Kıevti qorǵaý kezinde qaza boldy.
Barlyq áskerı rásimderdi saqtaı otyryp, máıit jaýyngerdiń nemeresine odan ári qaıta jerleý úshin berildi.
«Ýkraın halqyna, «Vertıkal» izdeýshilerine, bizdiń elshilik pen Qorǵanys mınıstrligine pandemııaǵa qaramastan atamnyń súıekterin jetkizgeni úshin alǵysymdy bildirgim keledi. Jaqynda biz týǵan jerimizge baryp, barlyq rásimderdi saqtaı otyryp, qaıta jerleımiz. Maǵan áleýmettik jelide habarlasyp, atamnyń sońǵy ret shaıqasqa qatysqan Kıev oblysy, Makarov aýdanynyń Borovka aýylynda tabylǵanyn habarlady», dedi qazaqstandyq jaýyngerdiń nemeresi Marat Tikshekeev.
Qaza tapqan jaýyngerlerdiń biri Seıd Toınashev 1922 jyly dúnıege kelgen. Jaýynger Mańǵystaý oblysynda qaıta jerlenedi.
Qazirgi ýaqytta Ýkraına tarapynan 1913 jyly týǵan gvardııalyq atqyshtar vzvodynyń komandıri, leıtenant О́ksikbaı Bazarbaevtyń súıekterin elge jetkizýge kómek kórsetilip jatyr.
Qazaqstandyq izdeýshilerdiń izdeý-ekspedısııalyq jáne muraǵattyq qyzmeti sheteldik áriptestermen tyǵyz yntymaqtastyqta júrgiziledi. Belsendilerdiń bul eńbegi surapyl soǵysta qaza taýyp, habarsyz ketkenderdiń esimin máńgi este saqtaýǵa sep bolady.