Qazaqstanda turatyn etnostardyń tarıhyna kóz júgirtseńiz, ártúrli taǵdyrlar men ómir ıirimderin kóresiń. Máselen, ótken ǵasyrdyń elýinshi jyldarynyń sońy men alpysynshy jyldardyń basynda KSRO-nyń ár túkpirinen jastardy elimizdegi tyń ıgerý jumysyna tartqan bolatyn. Qasıetti qazaq jerine kelgen túrli etnos ókilderi tamyryn tereńge jaıdy. Olardyń urpaqtary búginde birligi men tatýlyǵy jarasqan elimizge tastaı batyp, sýdaı sińdi. Ulttyq ulan qatarynda da mundaı azamattar barshylyq. Eline adal qyzmet atqarýda. Aǵa leıtenant Iаroslav Anıkaev – solardyń biri.
Iаroslav 6636 áskerı bólimi basqarý pýnkti ákimshilik tobynyń ofıseri, baılanys salasynyń beldi mamany. Ol elimizdiń bas qalasy Nur-Sultannyń týmasy. Elordada mektepti aıaqtaǵannan keıin, áskerı bolýdy sheship, kórshi eldegi Reseı Federasııasynyń Sankt-Peterbýrg qalasyndaǵy Qorǵanys mınıstrligi Áskerı baılanys akademııasyna oqýǵa túsedi. 2015 jyly atalǵan joǵary áskerı oqý ornyn aıaqtap, 5573 áskerı bóliminde baılanys rotasynyń vzvod komandıri bolyp eńbek jolyn bastaıdy. Keıin 6636 áskerı bóliminde vzvod komandıri bolyp qyzmetin jalǵastyrady. Eńbeksúıgishtigimen kózge túsken jas órendi Ulttyq ulan Bas qolbasshylyǵynda qabyrǵasy qalanǵan basqarý pýnktine qyzmetke taǵaıyndaıdy.
– О́z basym baılanys salasyn jaqsy kóremin. Baılanys salasyn áskerdiń bolashaǵy dep bilemin. О́ıtkeni, jaýyngerlik daıyndyqty qamtamasyz etetin negizgi salalardyń biri – sol. Baılanyssyz áskerdi elestetý múmkin emes. Sondyqtan kóp oqyp, kóp izdenemin. Múmkindik bolsa, semınar, oqý-jattyǵý jıyndaryna qatysamyn. Ofıser, Qazaqstan azamaty retinde elimniń damýyna óz úlesimdi qosqym keledi, – dep Iаroslav aǵynan jaryldy.
Áskerı qyzmette júrip, Ekaterına esimdi arýmen tanysyp, otbasyn qurady. Búginde ekeýi Nıkolaı esimdi uldy tárbıelep otyr. О́zi tyń ıgerýshilerdiń urpaǵy ekenin aıtady.
– Atam Nıkolaı – Reseı Federasııasy Ijevsk qalasynyń týmasy. Ákem 3 jasta bolǵanda búgingi Nur-Sultan, keshegi Aqmola qalasyna kóship kelgen. Naǵashylarym da sol kezderi Qazaqstanǵa qonys aýdarǵan. Anam Galına Nıkolaevna Bashqurtstanda týǵanmen, qalǵan ǵumyryn osy qalada ótkizip keledi. Atalarymyz tyń ıgerý jumystaryna óz eńbekterin sińirdi. Áke-sheshem osynda tanysty. Qazaq jerinde baqyt taýyp, otbasyn qurdy. Men de osy jerde týyp-óstim. Qazaqstan bizdiń ortaq Otanymyz, kıeli shańyraǵymyz. Shetelde de oqydym, basqa memleketterde de dostarym kóp. Alaıda bir uqqanym – birligi jarasqan, berekesi tasyǵan óz elimizdeı el joq. Osy elde turyp, elge qyzmet etýden asqan abyroı joq, – deıdi ulandyq ofıser.
Iá, keıipkerimiz Ulttyq ulan qatarynda el birligi jolynda qyzmet atqaryp, eline eńbegin sińirýde. Qazaqstandyq qoǵamǵa «kirpish bolyp» qalanǵan ofıserdiń alar asýy áli alda.
Daryn SEIITOV,
kapıtan