Oral qalasynda kópirden sekirip ólmek bolǵan 32 jastaǵy áıeldi aǵa serjant Asqar Nurǵalıev qutqaryp qaldy dep habarlaıdy Egemen.kz
Oqıǵa 26 qazan kúni túske taman bolǵan. Ulttyq ulannyń "Batys" qolbasshylyǵyna qaraıtyn 5517 áskerı bóliminiń qyzmetkeri aǵa serjant Asqar Nurǵalıev kezekshilikten óz kóligimen qaıtyp kele jatyp Shaǵan ózeninen áldekimniń sekirip ketkenin baıqap qalady. Asqar birden qutqarý qyzmetine mán-jaıdy baıandaı sala, kóligin jol jıegine toqtatady. Oılanbastan kıimin sheship, muzdaı sýǵa ol da sekiredi.
"Sol mezette ne bolyp, ne qoıǵanyn ózim de tolyq sezinbedim. Bar maqsatym adamdy qutqarý boldy. Áıeldiń ústinde qara tústi qalyń túbit kúrtesi boldy. О́zen aǵysy da qatty eken. Kúrteden tartyp, júzip, qyzdy jaǵaǵa jetkizdim. Bul isimdi erlik sanamaımyn. Meniń ornymda bolǵan kez kelgen adam osylaı jasar edi. О́ıtkeni adamdy ólimnen qutqarý – árbir jannyń azamattyq boryshy ǵoı", - deıdi aǵa serjant.
Asqar qyzdy jaǵaǵa alyp shyqqan kezde polısııa jasaǵy da, qutqarýshylar toby da jetip úlgergen bolatyn. Zardap shegýshini birden "Jedel járdem" alyp ketti. Ázirge onyń 32 jasta ekendigi ǵana belgili boldy. О́mirine tónip turǵan qaýip joq.
Oqys oqıǵa kezinde abdyramaı, erlik pen kásibı sheberlik kórsetip, sýǵa ketken adamdy qutqarǵan aǵa serjantty "Batys" qolbasshylyǵy marapatqa usyndy.
Aıta keteıik, Asqar Temirtaıuly Batys Qazaqstan oblysy Bókeı ordasy aýdanynyń Bısen aýylynda týyp ósken. 2015 jyldan beri «Ulttyq ulan» sapynda qyzmet etedi.
Batys Qazaqstan oblysy