Eske alsaq, qane, ózge de eren jandardy
Qazaq óleńinde ózindik órnegi bar aqyn Ádilbek Abaıdildanov edi. Sol aqynǵa arnalǵan kesh Qazaqstan Jazýshylar odaǵynyń Astana bólimshesiniń uıymdastyrýymen elordadaǵy Ulttyq akademııalyq kitaphanada ótti. Alǵashqy sózdi bólimshe basshysy, Memlekettik syılyqtyń laýreaty Nesipbek Aıtuly alyp, taıaýda ǵana jaryq kórgen aqynnyń tańdamaly jınaǵy týraly oı tolǵady. Bul eńbek ózge emes, artynda qalǵan qyzy Botagóz ben kúıeý balasy Júnisbektiń talpynysymen jaryq kórgenin tilge tıek etti.
Eske alsaq, qane, ózge de eren jandardy
Qazaq óleńinde ózindik órnegi bar aqyn Ádilbek Abaıdildanov edi. Sol aqynǵa arnalǵan kesh Qazaqstan Jazýshylar odaǵynyń Astana bólimshesiniń uıymdastyrýymen elordadaǵy Ulttyq akademııalyq kitaphanada ótti. Alǵashqy sózdi bólimshe basshysy, Memlekettik syılyqtyń laýreaty Nesipbek Aıtuly alyp, taıaýda ǵana jaryq kórgen aqynnyń tańdamaly jınaǵy týraly oı tolǵady. Bul eńbek ózge emes, artynda qalǵan qyzy Botagóz ben kúıeý balasy Júnisbektiń talpynysymen jaryq kórgenin tilge tıek etti.
Belgili aqyn Serik Turǵynbekov umyt qalyp bara jatqan aqynnyń artynda qalǵan murasyn jınaqtap shyǵarǵan urpaǵyna shynaıy alǵysyn bildirip, Ádilbek Abaıdildanovtyń óleńderi men poemalaryna taldaý jasady. Ásirese, bostandyq jolynda mert bolǵan «Qyran» poemasyndaǵy qyran tulǵasyna erekshe toqtaldy. Odan keıin «Jarysqa jaratylǵan jaraý attaı», dep «Ádilbek týraly áýen» atty óleńin oqydy. Qarymdy qalamger, kórkemsóz sheberi Sultan Orazaly «Ádilbekti es jıyp eske túsirip jatqanymyz ıgilikti is. Ádilbek sııaqty zamandastarymyz umyt qalyp, tarıhqa aınalyp bara jatqanda elgezektik tanytqan myna qadam qaı-qaısymyzdy da oılandyrýy tıis. Ádilbek keskindi de, kelbetti, sulý torydaı symbatty jigittiń tóresi edi. Ol bar bolǵany 44 jyl ómir súrdi. Biraq artyna qaldyrǵan murasy mol. Men osy arada aqynnyń nebir aıtýly tustastary bolǵanyn, olardyń qatarynda: Iztaı Mámbetov, Beken Ábdirazaqov, Nursultan Álimqulov, Shámil Muhamedjanov, Erkesh Ibrahım, taǵy basqalar bar edi. Solardy da osylaı eske túsirip, kesh ótkizsek, keıingi urpaqqa tanystyrsaq, azamattyq paryzymyzdy adal atqarǵan bolar edik», dep sóz aıaǵyn túıdi.
Memlekettik syılyqtyń laýreaty, jazýshy Qoıshyǵara Salǵarauly Ádilbek Abaıdildanovtyń syrshyl jyrlaryna, ásirese, el men jerdi tolǵaǵan poemalaryna erekshe nazar aýdardy. Rejısser Sáýlebek Asylhan aqyn óleńderinen úzindiler oqyp, qalamger Mátkárim Ákimjanov keıipkerlerge keńinen toqtaldy.
Kesh ánmen órnektelip, kúımen kómkerilip otyrdy.
Súleımen MÁMET,
«Egemen Qazaqstan».