Qostanaı oblysynda ótken oqý jylynyń sońǵy toqsanynda qashyqtan bilim alǵan 7 267 oqýshy áleýmettik azyq-túlik sebetterin alǵan, - dep habarlaıdy Egemen.kz
Oblystyq bilim basqarmasynyń basshysy Záýre Baımenovanyń aıtýynsha, karantınge deıin mektepte tegin tamaqtanyp kelgen ata-ana qamqorlyǵynan qaǵylǵan balalar men turmysy tómen, kóp balaly jáne tolyq emes otbasynda turatyn oqýshylar úshin 31 mln teńgege áleýmettik sebetter satylyp alynypty.
Igi shara jańa oqý jylynyń alǵashqy toqsanynda da qolǵa alynyp otyr. Bilim basqarmasy birinshi toqsan ishinde oblystyń barlyq óńirlerinde qashyqtan bilim alyp jatqan 5 myńǵa jýyq balaǵa jappaı oqytý qorynyń qarajaty esebinen áleýmettik sebetter úlestiriletinin aıtty.
Azyq-túlik sebetteri:
1) memlekettik ataýly áleýmettik kómek alýǵa quqyǵy bar otbasyndaǵy balalarǵa;
2) memlekettik ataýly áleýmettik kómek almaıtyn, jan basyna shaqqandaǵy tabysy eń tómengi kúnkóris deńgeıinen tómen otbasylardyń balalaryna;
3) jetim jáne ata-ana qamqorlyǵynan aıyrylǵan balalarǵa;
4) tótenshe jaǵdaılardyń saldarynan shuǵyl járdem kórsetýdi talap etetin otbasylardyń balalaryna;
5) bilim berý uıymynyń alqaly organy anyqtaıtyn bilim alýshylar men tárbıelenýshilerdiń ózge de sanattaryna beriledi.
Búginde oblys boıynsha 13 myń oqýshynyń ata-anasy áleýmettik sebet berý týraly ótinish túsirgen.
- Kelip túsken ótinishter boıynsha Áýlıekól, Amangeldi, Qamysty, Qarabalyq, Qarasý aýdandarynda, Qostanaı, Lısakov jáne Rýdnyı qalalarynda 3 myńǵa jýyq azyq-túlik sebeti berildi. Al oblys ortalyǵynda 30 qazanǵa deıin 1733 oqýshy azyq-túlik sebetin alatyn bolady, - dedi basqarma basshysy.
Qostanaı oblysy