Oblystyq mańyzy bar avtomobıl joldary qysqy merzimde kútip ustaý jumystaryna daıyn. Túrkistan oblysy jolaýshylar kóligi jáne avtomobıl joldary basqarmasynyń bólim basshysy Sherzat Súttibaev osylaı dedi BAQ ókilderiniń qatysýymen ótken brıfıngte.
Jalpy 4152,34 shaqyrym joldyń 1943,3 shaqyrymy birinshi kezektegi qardan tazalanyp, ınertti materıaldar sebiletin joldar bolsa, onyń ishinde 434 shaqyrymy taýly óńirlerdegi qar qatty basyp qalýy qaýpi joǵary aımaqtar.
Sonymen qatar, oblystyq mańyzdaǵy joldy qys mezgilinde kútip ustaýǵa oblystyq bıýdjetten 69 mln teńge qaralǵan, 354 jumysshy men 124 tehnıkany jumyldyrý josparlanǵan. Qys mezgilinde halyqtyń qaýipsizdigin qamtamasyz etýge shuǵyl áreketterdi jasaýǵa jol mekemelerimen jedel habarlandyrý syzbasy bekitilgen. «Joldardyń jaı-kúıin kúndelikti baqylaý jáne tótenshe jaǵdaılar departamentimen der kezinde aqparat almasý úshin táýliktik kezekshilik uıymdastyryldy. Sonymen qatar, aýa raıynyń qolaısyz mezgilinde jolda qalyp qoıǵan jolaýshylarǵa jaǵdaı jasaý maqsatynda oblystyq mańyzy bar avtomobıl joldarynyń boıynda 4 jylytý beketi ornalasqan. Atap aıtqanda, Báıdibek aýdanynda, «Qoshqarata-Jaryqbas-Birlik» avtomobıl jolynyń 28-shi shaqyrymynda «Shybyqbel» jáne «Ulanbel-Sozaq-Shaıan-Ekpindi» avtomobıl jolynyń 605-shi shaqyrymynda «Odamanbulaq» jylytý beketteri bar. Sondaı-aq, Sozaq aýdanynda «Jambyl oblysynyń shekarasy-Qumkent-Sholaqqorǵan-Kentaý» avtomobıl jolynyń 63-shi shaqyrymynda «Ashysaı» jáne «Ulanbel-Sozaq-Shaıan-Ekpindi» avtomobıl jolynyń 593-shi shaqyrymynda «Taskómirsaı» jylytý beketteri oranalasqan. Barlyq jylytý beketterin jyly kúıde ustaý maqsatynda kezekshi qoıylyp, 60 tonna kómir otynymen qamtamasyz etildi», dedi Sherzat Anarqululy.
Al Tótenshe jaǵdaılar departamenti bastyǵynyń orynbasary Erik Sarybaev jylytý maýsymynda qajetti qatty otyn kólemi 1 003,2 myń tonna bolsa, búginde 294,1 myń tonnasy tasymaldanǵanyn málim etti. «2020-2021 jyldardaǵy jylý berý maýsymyna daıyndyq barysy josparǵa saı júrgizilýde. Oblys boıynsha 586 kópqabatty turǵyn úı ortalyqtandyrylǵan jylýmen qamtamasyz etiledi. Onyń 442-si qysqy maýsymǵa daıyndalǵan. Al 2623 bıýdjettik mekemelerdi aldaǵy jylý maýsymyna daıyndaý josparlanǵan, búgingi kúnge 2253 mekemege daıyndyq jumystary júrgizildi», dedi Erik Temirhanuly.
Túrkistan oblysy