Býdapeshtte júlde buıyrmady

Atalǵan jarys álemdi sharpyǵan pandemııaǵa baılanysty kórermensiz jáne saqtyq sharalaryn saqtaı otyryp ótkizildi. Bul retki týrnırdiń ereksheligi – balýandarǵa «Tokıo 2021» Jazǵy Olımpııa oıyndaryna qajet upaı jınaýǵa múmkindik týǵyzdy. Jarysqa bes qurlyqtyń 69 memleketinen 459 sportshy (287 er, 172 áıel) qatysyp, baqtaryn synady.

Jarysqa elimiz atynan 60 kılo salmaqta Ǵusman Qyrǵyzbaev, 66 kılo salmaqta Erlan Serikjanov pen Eldos Jumahanov, 73 kılo salmaq boıynsha Jansaı Smaǵulov, 81 kıloda Dıdar Hamza, 100 kıloda Aıbek Serikbaev pen Vıktor Demıanenko, +100 kıloda Ǵalymjan Qyryqbaı men Erasyl Qajybaev, qyzdardan 57 kılo salmaq dárejesine Sevara Nıshanbaeva qatysty.

Jarystyń alǵashqy kúni tatamıge shyqqan S.Nıshanbaeva ekinshi beldesýden asa almasa, 60 kılo salmaqta synǵa túsken Ǵusman Qyrǵyzbaev alǵashqy beldesýinde ázerbaıjandyq Davled Mammadsoıdan basym túsip, ekinshi beldesýinde jergilikti balýan Najı Davıdten utyldy. Odan keıin jubanysh beldesýge múmkindik alǵanymen, mońǵol balýany О́nóbold Lhagva-Jamsdan aılasyn asyra almaı, úsh eskertýdiń kesirinen jarys jolynan shyǵyp qaldy.

66 kılo salmaqta kúresken el úmiti, Azııa chempıonatynyń (2017 j) kúmis medal ıegeri Eldos Jumahanov alǵashqy kezdesýinde ótken jylǵy Eýropa oıyn­darynyń chempıony grýzın balýany 22 jastaǵy Bagrat Nınıashvılıge shama­sy jetpedi. Al álem chempıonatynyń (Ba­ký, 2018) kúmis júldegeri, ótken jylǵy Azııa chempıony, birden-bir úmitimiz Erlan Serik­janovtyń densaýlyǵyna baılanys­ty dá­rigerler tatamıge shyǵýyna ruqsat etpedi.

Jarystyń ekinshi kúni 73 kılo sal­maqta synǵa túsken Jansaı Smaǵulov birinshi kezdesýinde fransýz balýany M.Dýbaıstan basym túskenimen, kelesi beldesýinde Aýstrııa jigiti L. Reıterge ese jiberip, jarys jolynan shyǵyp qalsa, 81 kıloda óner kórsetken Dıdar Hamza áýelgi beldesýinde jergilikti balýan, ótken jylǵy Eýropa oıyndarynyń qola júldegeri, tájirıbeli sportshy Attıla Ýngvarıdy utqanymen, kelesi kezekte ózbekstandyq jas balýan Sharofıddın Boltaboevtan jeńilip qaldy.

Týrnırdiń sońǵy kúni 90 kılo sal­maq­ta tatamıge shyqqan tájirıbeli balýan Islam Bozbaev birinshi beldesýinde Ispa­nııa atynan kúresip júrgen 1996 jyly týǵan grýzın azamaty, dzıýdodan álem chempıony (2018 j.) Nıkoloz Sheraza­dıshvı­lımen joly túıisip, jeńilip qaldy. Al 100 kıloǵa deıingi salmaq dárejesinde beldesken jerlesimiz Vıktor Demıanenko alǵashqy beldesýinde serbııalyq balýan, dzıýdodan 2017 jylǵy Eýropa chempıony Aleksandar Kýkolden taza jeńilse, ekinshi úmitimiz Aıbek Serikbaev birinshi beldesýinde mońǵol balýanynan aılasyn asyrǵanymen, ekinshi kezekte ázerbaıjandyq Zelım Kosoevtan utyldy. Asa aýyr salmaqta (+100 kılo) kúres­ken qos alybymyzdyń biri – Ǵalymjan Qyryqbaı Majarstan sportshysy Rıchard Shı­pochdan alǵashqy aınalymda jeńilse, ke­le­si úmitimiz Erasyl Qajybaev ta grý­zın alyby Levan Matıashvılıden utyl­dy.

Osylaı, Eýropa tórindegi Býdapesht qalasynda ótken ǵalamdyq dodadan bizdiń balýandarǵa júlde buıyrmady.