Dál osy kúnderde Almatyda bos jatqan jerlerde jańa qoǵamdyq keńistikter paıda bolyp otyr, dep habarlaıdy Egemen.kz
Almaty ákimi Baqytjan Saǵyntaev búgin Alataý aýdanyna jumys sapary kezinde qoǵamdyq keńistikterdiń abattandyrylý barysymen jáne ınfraqurylymdyq máselelerdiń sheshilýimen tanysty.
B.Saǵyntaev ıesiz bos jatqan jerlerdiń ornynda paıda bolǵan birqatar qoǵamdyq keńistikterde boldy. Jumyspen qamtýdyń jol kartasy aıasynda "Aqbulaq", "Shapaǵat", "Qarasý" yqshamaýdandarynda skverler salyndy jáne jóndeldi, sonymen qatar Móńke bı kóshesindegi vorkaýt alań iske qosyldy.
"Sporttyq jáne balalar aımaǵy búldirshinge toly bolsa, alleıada aqsaqaldar serýendep júr.Turǵyn úılerdiń mańaıy qańyrap bos turdy degenge sený qıyn. Mundaǵy turǵyndarmen áńgimelesip, jańa qoǵamdyq keńistikterdi kútip ustaýǵa shaqyrdym", dep jazdy B.Saǵyntaev óziniń Instagram-daǵy paraqshasynda.
Sondaı-aq qala ákimi 78 gektar jerge áleýmettik belsendiler men eko-belsendilerdiń kúshimen jyl basynda salynǵan qaraǵaıly ormandy abattandyrý barysymen tanysty. "JQJK" sheńberinde munda abattandyrý jumystary júrgizilip, sýarý júıesi qarastyrylǵan. Jalpy, Alataý aýdanynda jasyl jelekterdiń aýmaǵy eki esege jýyq kóbeıedi, jasyl jelekter sany 355 myńǵa jetedi, onyń 176 myńy bıyl Jasyl Almaty baǵdarlamasy aıasynda otyrǵyzylady.
Sonymen qatar, B. Saǵyntaev jol salý jáne jóndeý ýchaskelerin qarap shyqty, sonymen qatar "Uljan" jáne "О́jet" yqshamaýdandarynda ınjenerlik jeliler men syrtqy jaryqtandyrý júıesin salý jumystarynyń barysymen tanysty.
"Baqytty otbasy" aýdandyq kópbalaly analardy áleýmettik qoldaý ortalyǵynda Almaty qalasynyń ákimi B.Saǵyntaevqa jyl ishinde júrgizilgen ózgeristerdiń nátıjeleri tanystyryldy. Onyń nátıjesi kóp balaly analardyń belsendi ómirge aralasýy boldy. Jyl basynan beri 25 myń áıel "Isker ana" baǵdarlamasy boıynsha negizgi trenıngter men kýrstardan ótti. 537 áıel "Bıznes Bastaý" baǵdarlamasy boıynsha oqydy, onyń 300-i grant alyp, ár túrli baǵytta óz kásibin ashty.