Igi istiń jolyndaǵy eriktilerdiń arasynda júrip-turýy qıyn, sóıte tura baıraqty básekelerde elimizdiń namysyn qorǵap júrgen múgedek jandardyń kómekshilerine aınalǵany az emes. Ataýly jylda dáıim jaqsylyqqa umtylatyn óńirdegi volonterlik toptardyń sany da edáýir artqany kóp nárseni ańǵartsa kerek.
Kómek tek qarjylaı bolmaıdy...
Qazaqstannyń Eńbek Eri Quralaı Baımenovanyń bastamasymen ashylǵan «D.A.R.» volonterler klýbyn bilmeıtin aqtóbelikter kemde-kem. 2007 jyldan beri dostyq, adaldyq, raqymshylyqty tý etip kele jatqan belsendilerdi sóz etkende sońǵy ýaqytta «Sportıkı» toby da eriksiz oıǵa keledi. О́ıtkeni sońǵysy – «D.A.R.» eriktiler klýbynyń janynan qurylǵan. Bir ǵana baǵytty qamtıtyn uıym sportpen kásibı túrde aınalysatyn múgedek jandardyń júrip-turýyna, jattyǵý jasaýyna, ózge de qajetti amal-áreketine kómekke keledi. Iаǵnı mundaǵy volonterler negizinen irili-usaqty jarystarǵa jumyldyrylady.
– Paralımpıadalyq oıyndarǵa, ózge de arnaýly saıystarǵa qatysý úshin bizge kómekshiler qajet-aq. Sol maqsatta ótken jyldyń kúz mezgilinde bir top jasty arnaıy oqytyp, munyń barlyq jaı-japsaryn úırettik. Qazirgi tańda klýbymyzda 35 erikti bar. Olar múmkindigi shekteýli jandar arasynda ótetin jarystarǵa qolǵabys tanytyp ta úlgerdi, – deıdi «Sportıkı» eriktiler klýbynyń úılestirýshisi Gúlmıram Srajova.
О́ńirde atalǵan toptaǵy adamdar arasynda sportpen kásibı túrde shuǵyldanatyndardyń sany 60-tan asady. Solarǵa jáne Aqtóbede uıymdastyrylǵan jarystarǵa qatysýǵa kelgen ózge azamattarǵa qolǵanat bolatyndardyń biri, joǵaryda atalǵan klýbtyń múshesi – Jiger Kenjeǵalıev. 25 jastaǵy jigit 5 jyldan beri volonter eken.
– «D.A.R.», «Jeńis» eriktiler tobynda boldym. Byltyrdan beri «Sportıkı» klýbynyń múshesimin. Mamandyǵym – dızaıner. Jumystan tys ýaqytta osyndaı saýapty ispen aınalysqandy jón kóremin. О́tken jyly oblysta «Úzdik volonter» atandym. Jaqsylyq jasaý ár adamnyń paryzy dep bilemin. Qoldan kelse, nege kómektespeske?! Janasyl Hamıdýlla, Damır Bıjanov, Dáýren Sádýaqas, Mereı Smadııarov syndy jigittermen áleýmettik jobalarǵa da qatystyq. Qazirgi tańda múmkindigi shekteýli adamdardyń halyqaralyq, respýblıkalyq, oblystyq deńgeıdegi jarystarǵa daıyndalýyna kómektesemiz. Volonterliktiń bul túri shetelde óte jaqsy damyǵan. Bizde de birtindep qarqyn alyp keledi, – deıdi Jiger.
Keıde sóz járdeminiń ózi úlken ról atqaratynyn aıtqan áńgimelesýshimiz zamandastarynyń osyndaı ıgi iske jaqyn bolǵanyn, elimizde volonterler qyzmetiniń odan saıyn jandana túskenin tileıdi.
«Volonterlerdiń de eńbegin baǵalaǵan abzal»
I toptaǵy múgedek bolǵanyna qaramastan, kásibin dóńgelentip, úlken sportpen de aınalysyp júrgen Shahan Joldasbaevtyń volonterlerge degen qurmeti alabóten. Osy saladaǵy birtalaı jaqsy jigittermen, qyzdarmen aralasatyn ol elimizdegi volonterler qozǵalysyna qamqorlyqtyń áli kemshin ekenin aıtady.
– 2011 jyldan beri aqtóbelik eriktilermen tyǵyz baılanystamyn desem bolady. Olar taǵdyrlastaryma materıaldyq qana emes, rýhanı, fızıkalyq ta qoldaý kórsetedi. Mysaly, paralımpıadalyq oıyndarǵa qatysýshylardyń janynda septesip júrýiniń ózi – úlken demeý. Qol jalǵap, qolarbasyn kóterip, ózge de kúshi jetpeı jatqandaǵy kómegin aıtyp otyrmyn. О́z basym dál mundaı sanattaǵy volonterlerdiń kómegine asa kóp júginbeımin. Sebebi inim árdaıym qasymda júredi. Biraq men aralasatyn ortada olardyń orny bólek ekenin bilemin jáne Aqtóbede osy maqsattaǵy «Sportıkı» volonterler klýbynyń jumys istep jatqanyna qýanyshtymyn.
О́kinishke qaraı, bizde áli kúnge deıin volonterlerdi erigip júrgen jastar retinde qabyldaıtyndar kóp. Olardyń pikirinshe, qaıyrymdy ispen tek qoly bos jetkinshekter aınalysady. Bul – qate túsinik. Iá, Qazaqstanda volonterlerdiń deni – jastar, biraq olardyń arasynda shynymen izgi isterge umtylǵany az emes. Basqa oıdy kózdegender de bar. Bir anyǵy, bizde sheteldegideı volonterlerge qoldaý atymen joq. Aıtalyq, jumysqa turarda onyń qoǵamdyq qyzmeti, aqysyz kómekke úlesi eskerile bermeıdi. Biz bul jaǵynan AQSh, Germanııadaǵy deńgeıge jete qoımadyq.
Búginge deıin volonterlermen kóptegen jobany iske asyrdyq. Halyqaralyq jarystarǵa qatysarda aýdarma isine kómekteskenderi de boldy. Kelinshegim de kezinde belsendi volonterlerdiń biri bolǵan. Jalpy, bul qatardaǵy dostarym barshylyq. Sondyqtan olarǵa sóz júzinde ǵana emes, ispen qoldaý kórsetilgenine tilektespin. Oqý aqysyna jeńildik jasalyp, olardy ózge zamandastaryna úlgi etse, atqarýshy bılik eńbegin elese, artyq bolmaıdy, – deıdi Shahan.
90 top. 2 myń adam
Aqtóbe oblystyq Jastar saıasaty máseleleri basqarmasynyń basshysy Sábıt Muqanovtyń aıtýynsha, jyl basynda óńirdegi volonterlik toptardyń sany 35 bolsa, qazir 90-ǵa jetken. Bul uıymdardyń quramynda 2 myńnan astam volonter bar.
– Oblys boıynsha volonterler bazasy jasaqtalyp jatyr. Sanattaryna qaraı aıtsaq, 45 paıyzy jumysshy jastar bolsa, qalǵanyn stýdentter men oqýshylar quraıdy. Bizge tirkelgen volonterdiń eń úlkeni 41 jasta, al kishisi – 2006 jyly týǵan jasóspirim.
«Volonter jylynyń» «Birgemiz» tujyrymdamasy negizinde 7 baǵytta jalpyulttyq jobalar júzege asyrylyp jatyr, olar – «Bilim», «Sabaqtastyq», «Saýlyq», «Taza Qazaqstan», «Asyl Mura», «Qamqor» jáne «Úmit». Árqaısysynyń baǵyty árqıly. Mysaly, ekologııany jaqsartý maqsatynda volonterler jyl basynan beri 138 tazalyq aksııasyn ótkizdi. Al «Asyl mura» jobasy boıynsha Oıyl, Shalqar, Muǵaljar, Qobda, Alǵa aýdandaryna ekspedısııa uıymdastyryldy. Sharaǵa 40-qa jýyq volonter tartylyp, týǵan ólkeniń tarıhı jerlerimen tanysýǵa múmkindik aldy. Mundaı jumystar kelesi jyly da jalǵasyn tabady, – deıdi ol.
Sonymen qatar aqtóbelik volonterler «Jaqynyńa janashyr bol!» aksııasy aıasynda qoǵamdyq oryndarda 2 myńǵa jýyq medısınalyq maskany úlestirip, karantın kezinde qoldan kelgenshe qoldaý kórsetken. Olardyń rııasyz kóńili eleýsiz qalmaǵan. 40 volonter Elbasynyń, Prezıdenttiń, oblys ákiminiń Alǵys hattarymen marapattalypty.
Aıbek TASQALIEV,
jýrnalıst
AQTО́BE