Sıfrlyq damý, ınnovasııalar jáne aeroǵarysh ónerkásibi mınıstrligi Astana Hub jáne Qaraǵandy «Terrıkon alqaby» IT-habymen birlesip, bıyl 2 qarashadan bastap IT kompanııalar men frılanserler úshin akselerasııalyq baǵdarlamany iske qosady.
Akselerator halyqaralyq naryqqa shyǵýdy josparlap otyrǵan IT kompanııalar men frılanserler úshin 6 jáne 4 aptalyq tegin oqý kýrsyn qamtıdy.
«Osy joba bizdiń mamandarǵa syrtqy naryqtarda, shetelde suranysqa ıe bolýǵa múmkindik beretin bilim men quzyrettilik qoryn qalyptastyrýǵa baǵyttalǵan. Arnaıy komıssııa portfolıo boıynsha 30 qatysýshyny tańdaıdy. Ony joba saıtynda saýaldama derekterin toltyrý arqyly usyný qajet», dep túsindirdi Sıfrlyq damý, ınnovasııalar jáne aeroǵarysh ónerkásibi mınıstrligi IT damytý departamentiniń dırektory Darhan Ahmedıev.
Oqytý baǵdarlamasy dáristerden, vorkshoptardan, mentorlarmen jáne sarapshylarmen birqatar baǵyt boıynsha jumystardan turady. Atap aıtqanda maqsatty naryq pen básekelesterdi zertteý; maqsatty klıenttiń portreti men qundylyq usynysynyń sıpattamasy; klıent úshin ónimdi oraý; saýda-sattyqty saralaý jáne pipeline satýdy baptaý; masshtabtaý. Baǵdarlama qatysýshylary – tómende kórsetilgen nemese uqsas qyzmetterdi usynatyn IT kompanııalar men frılanserler. Bular baǵdarlamalyq qamtylymdardy, saıttardy, mobıldik qosymshalardy tapsyrys berýge ázirleıdi; UX/UI boıynsha qyzmetterin kórsetedi; dızaın nemese brendıng jasaıdy; digital-marketıng boıynsha qyzmetter kórsetedi.
Baǵdarlamaǵa qatysý úshin ótinimdi bıyl 31 qazanǵa deıin jiberýge bolady. Oqytý onlaın arqyly júrgiziledi.
IT kompanııalarǵa oqýdyń bastalýy 2 qarashadan, al frılanserlerge 9 qarashadan bastalady.
Tirkeýge silteme jáne baǵdarlamanyń jalpy sıpattamasy boıynsha aqparat – https://taplink.cc/terriconvalley