Qurlyqtyq hokkeı lıgasynyń (QHL) kezekti týr oıynyn syrtta ótkizgen Nur-Sultannyń «Barysy» Sochıdiń «Sochı» komandasynan jeńilip qaldy.
Novosibir qalasynda «Sıbırden» jeńilgennen keıin «Barystyń» bapkerleri quramaǵa azdaǵan ózgeris engizgen-di. Alaıda odan esh nátıje shyqqan joq. Bir qyzyǵy, bul básekede de hokkeıshiler birinshi kezeńde gol soǵa almady. Ekinshi kezeń bastalǵan bette muzaıdyn ıelerinen Malte Strıomvall 21-mınýtta jyldam gol soǵyp, esep ashty. Ekinshi 20 mınýtty sátti bastaǵan «Sochı» oıynshylary kezeń aıaqtalar tusta da «Barys» hokkeıshilerinen aılasyn asyryp ketti. Bul joly Danııl Mıromanov mergendigimen kózge tústi.
Úshinshi kezeńde jerlesterimiz jaqsy oıyn órnegin kórsetkenimen, bul kezdesýde gol soǵý baqyty buıyrmady. Jerlesterimiz qarymta shaıba soǵamyz dep júrgende «Sochı» bizdiń qaqpaǵa úshinshi shaıbasyn salyp ketti. Matchtyń sońǵy mınýtynda Danııl Mıromanov bos qalǵan qaqpany dál kózdep, dýbl avtory atandy.
«Barys» turaqty birinshiliktegi kelesi kezdesýin búgin Nur-Sultanda Qytaıdyń «Kýnlýn» komandasymen ótkizedi.