Asarlatyp úı saldy

Osy aýyldyń baıyrǵy turǵyny, II top múgedegi Orysbaı Naýhanbaevtyń aýla­syn jyl saıyn sý basyp qalady eken. Byltyrǵy orazada aýyl azamattary ózara aqyldasyp, jańa baspananyń irgetasyn da quıyp qoıǵan edi. Biraq bıylǵy kóktemde úzdiksiz jaýǵan nóser sýy aqsaqaldyń úıin tolyq basyp qalypty. Osy aýyldaǵy №92 orta mektep muǵalimi Sábıt Yqylasov osy jaǵ­daı­dy Feısbýktegi paraqshasynda ja­rııa­laǵan soń, jerlesteriniń jaǵdaıy­na alańdaǵandar qatary kúrt kóbeıgen.

– Aýyldaǵylar ǵana emes, elimiz­diń ár túk­pirinde júrgen azamattar da habarlasyp, kómek qolyn sozatynyn jetkizdi. Solaı boldy da. Nebári 3 kúnniń ishinde 1,6 mln teńge aqsha jınaldy. Osylaı­sha, bizdiń qaıyrymdylyq isimizge aýyl­dyń úlken-kishisi de, syrttaǵy tilekshi aǵaıyn da bir kisideı atsalysty. Úıdiń quryly­s­yn salýǵa bir tıyn da aqsha jum­samadyq. Úıdiń irgetasyn quıýdan bastap, kirpishin qalap, shatyryn jabý, syrtyn sylap-árleý jumystaryna de­­ıin aýyldyń jigitteri atqardy. Kúni­ne 100 adamǵa deıin kelgen ýaqyt ta boldy. Sondyqtan bul iske at­salysqan barsha azamat­tarǵa aýyl turǵyndarynyń atynan alǵys aıtamyz, – deıdi Sábıt Yqylasov.

Asarlatqan aýyl aza­mat­tary­nyń arqasynda Orysbaı Naýhanbaevtyń otbasy qazir jyly da jaıly úıge kóship aldy.

– Men týǵannan II top múgedegimin. Áıelim de – múmkindigi shekteýli jan. Biz turmaq myna zamanda tepse temir úzetin azamattardyń ózi áp-sátte úı salyp alýy neǵaıbyl ǵoı. Sý basqannan jyl saıyn qabyrǵalary sógilip bara jatqan baspanamnyń jaıy qabyrǵama batyp, oılanyp júrgende úıdiń irge­tasy da quıyldy, azamattardyń arqa­synda kirpish pen aǵash keldi. Kerek­tiń bárin jigitterdiń ózderi tapty. Jer­les­terimniń arqasynda jaqyn­da ja­ńa úıge qonys aýdardyq, – deıdi Q.Pirimov aýylynyń turǵyny Orys­baı Naýhanbaev.

Azamattar osy aýyl­dyń taǵy bir turǵyny Bektileý Iztileýovtiń úıine de kúrdeli jóndeý jumys­taryn júr­gizip jatyr. Olar tozyǵy jetken bas­pananyń edenin, terezesin jáne shatyryn tolyq aýystyryp, qazir ishi-syrtyn sylap jatyr.

Qyzylorda