Indet qos búıirden qysqan kúrdeli kezeńde qajetti saqtyq sharalaryn barynsha eskere otyryp, jańa oqý jyly jalǵasyp jatyr. Qazir mektepterde birinshi toqsan aıaqtalýǵa jaqyndady. Oqýshylar 28 qazannan bastap toqsandyq jıyntyq baqylaý tapsyrýdy bastady.
Qashyqtan oqytý kezindegi jıyntyq baǵalaý 2-11-synyptarda aptasyna 2 jáne odan da kóp aptalyq júktemesi bar oqý pánderi boıynsha formatıvti baǵalaý, bólim boıynsha jıyntyq baǵalaý (BJB) jáne toqsandyq jıyntyq baǵalaý (TJB) júrgiziledi. 2-11-synyptarda aptasyna 1 saǵat oqý júktemesi bar oqý pánderi boıynsha formatıvti baǵalaý, BJB júrgiziledi jáne olardyń negizinde jarty jyldyqqa baǵa qoıylady, TJB júrgizilmeıdi.
1-synypta bilim alýshylardyń oqý jetistigi baǵalanbaıdy. Jyldyq baǵa qoıylmaıdy. BJB jáne TJB sany bir kúnde úsh jıyntyq baǵalaýdan aspaýy kerek. 2-4-synyptarda BJB jáne TJB ýaqyty rettelmeıdi, ár pán boıynsha 2 tapsyrmadan aspaıdy. Al 5-11-synyptarda 3 tapsyrmadan artyq berilmeıdi.
BJB jáne TJB kestesin mektep ákimshiligi ázirleıdi. Bul boıynsha tapsyrmalardy muǵalimder pánder boıynsha spesıfıkasııaǵa sáıkes ózderi daıyndaıdy.
Bilim jáne ǵylym mınıstrliginiń Mektepke deıingi jáne orta bilim komıtetiniń tóraıymy Maıra Meldebekova BJB men TJB jumystary oqý jylynyń sońyna deıin tek elektrondy túrde saqtalatynyn málimdedi.
«Barlyq mektepte jıyntyq baǵalaý jumystary bólim boıynsha ótti. Endigi másele – osy oqý jylynyń birinshi toqsanyn qalaı qorytyndylaımyz, jıyntyq baǵalaýdyń nátıjesin qalaı shyǵaramyz? Jalpy, bilim berý uıymdarynda oqý pánderi kúni jáne ýaqyty turǵysynda árbir mektepte óziniń kestesi boıynsha jasalady. BJB men TJB jumystary oqý jylynyń sońyna deıin tek elektrondy túrde saqtalady. Bul boıynsha bizge kóp suraqtar kelip túsedi. Biraz mektep ákimshilikteri osyny qaǵaz túrinde shyǵaryp, sony saqtap qoıýǵa nusqaý beredi eken. Ony isteýdiń qajeti joq. Elektrondy túrde daıyndaǵannan keıin, solaı ǵana saqtalýy kerek», dedi M.Meldebekova.
Oqý jylynyń ekinshi toqsanynda mektepte oqytý formattary boıynsha aldyn ala esepteýler júrgizildi. Ekinshi toqsanda oqý formattary boıynsha balalardyń boljamdy sany: qashyqtan oqytý formatynda – 2,2 mln, dástúrli formatta – 1,2 mln, onyń ishinde kezekshi synyptarda (1-5-synyp) – 800 myńnan asa bala, shaǵyn jınaqty 4 010 mektepte – 434 myń oqýshy, 13 halyqaralyq mektepte 3 myńǵa jýyq oqýshy (1-7 synyp) bilim alady.