О́ńir elderiniń ýákiletti organdarynyń jetekshileri, Izraıl men Estonııanyń halyqaralyq sarapshylary jáne BUU-nyń jetekshi mamandarymen birlesip, elektrondy úkimetti damytýdaǵy zamanaýı ınnovasııalyq sheshimderdi usyndy. Halyqaralyq konferensııaǵa Eýropa, Azııa jáne Amerıkanyń 20 elinen memlekettik organdar men elektrondy úkimetti damytý salasyndaǵy jáne halyqaralyq uıymdardyń, sondaı-aq ýnıversıtetterdiń 100-den astam ókilderi qatysty.
«BUU-nyń elektrondy úkimet jónindegi zertteýi aıasyndaǵy óńir elderinde elektrondy úkimettiń damýyndaǵy jetistikter men syn-tegeýrinder» atty onlaın-konferensııany Astana memlekettik qyzmet haby, Sıfrlyq damý, ınnovasııalar jáne aeroǵarysh ónerkásibi mınıstrligi, BUU Ekonomıkalyq jáne áleýmettik máseleler jónindegi departamenti, «Zerde» holdıngi birlesip uıymdastyrdy.
Konferensııa barysynda qatysýshylar ózara árekettesý keleshegi jáne osy másele boıynsha jahandyq jáne óńirlik yntymaqtastyqty nyǵaıtý qajettiligin talqylady.
Sıfrlyq damý, ınnovasııalar jáne aeroǵarysh ónerkásibi mınıstri Baǵdat Mýsın konferensııany asha otyryp: «Pandemııa memlekettik jáne áleýmettik qyzmetterdi usynýdyń dástúrli tásilderiniń álsiz jaqtaryn aıqyndap qana qoımaı, kóptegen syn-qaterge jaýap berýde sıfrly tehnologııalardyń mańyzdy ekenin kórsetti», dep atap ótti.
Sonymen birge mınıstr BUU-nyń zertteý nátıjeleri sıfrly transformasııa jolynda memleketterdiń aıtarlyqtaı ilgeri qadam jasap jatqanyn aıtty.
Osy oraıda Astana memlekettik qyzmet haby Basqarýshy komıtetiniń tóraǵasy Álıhan Baımenov: «COVID-19 pandemııasy senimniń áleýmettik qundylyq qana emes, kez kelgen strategııany, sonyń ishinde elektrondy úkimet strategııasyn iske asyrýǵa aýadaı qajet ekenin ári tıimdi ákimshilik kapıtal retindegi mańyzdylyǵyn kórsetti. Jańa tehnologııalardy qoldanýda kez kelgen asyra silteýshilikke jol bermeı, sheshim qabyldaýda ashyqtyq jáne jarııalylyq qatar júrý kerek. Tájirıbe almasý zamanaýı tehnologııalardy qoldanýǵa da, jańa jaǵdaıda azamattardyń quqyqtary men bostandyqtaryn qorǵaýǵa da qatysty bolýy óte mańyzdy», dedi.
BUU Ekonomıkalyq jáne áleýmettik máseleler jónindegi departamenti (UN DESA) Elektrondy úkimet basqarmasy jetekshisi Vınchenso Akýaronyń aıtýynsha, elektrondy úkimetke jasaǵan sholý boıynsha memlekettik sektordaǵy sıfrly transformasııany jedeldetýge degen suranys sońǵy aılarda kúrt ósken.
«Buǵan qosa pandemııanyń yqpaly úkimet pen qoǵamdy daǵdarysqa qysqa merzimde jaýap berý, orta merzimde sonyń saldaryn joıý jáne uzaq merzimde strategııalyq sheshimder men quraldardy ázirleý úshin sıfrly tehnologııalarǵa júginýge májbúr etti. Bizge osy serpilisti ári qaraı kúsheıtip, sıfrly progressti odan ári ilgeriletip, sıfrly alshaqtyqty eńserý qajettigin esten shyǵarmaı, eldiń ishinde de, memleketter arasynda da eshkimdi nazardan tys qaldyrmaýymyz kerek», dedi Vınchenso Akýaro.
UN DESA sarapshysy Arpıne Korekıan óz baıandamasynda BUU-nyń 2020 jyl boıynsha elektrondy úkimettiń damý deńgeıine qatysty zertteýdiń sheshýshi nátıjeleri men trendterin tanystyrdy. Soǵan sáıkes BUU-ǵa múshe 193 memleket arasynda 126 memlekette elektrondy úkimettiń damý deńgeıi joǵary jáne óte tıimdi dep anyqtalǵan.
Solardyń arasynda Danııa, Ońtústik Koreıa jáne Estonııa elderi kósh bastap tur. Al TMD elderiniń arasynda Qazaqstan úkimettiń ashyq derekteri, onlaın-qyzmetter damý deńgeıi ındeksi jáne teńizge shyǵa almaıtyn elder ishindegi ındeksi boıynsha aldyńǵy orynǵa shyqqan.
Izraıldiń Ulttyq sıfrly mınıstrligine qarasty memlekettik AKT basqarmasy bas atqarýshy dırektorynyń mindetin atqarýshy Shahar Braha, BUU-nyń Azııa men Tynyq muhıty óńirine arnalǵan ekonomıkalyq jáne áleýmettik komıssııasy AKT jáne apattar qaýpin azaıtý jónindegi departament dırektory Tısıana Bonapache, Estonııanyń elektrondy basqarý akademııasy atqarýshy dırektory jáne basqarma tóraǵasy Hannes Astok koronavırýs pandemııasy kezinde memlekettik qyzmetterdi tıimdi usyný boıynsha ozyq tájirıbelerimen, sondaı-aq biregeı ınnovasııalyq sheshimderimen bólisti.
Osy qatarda Qyrǵyz Respýblıkasynyń Aqparattyq tehnologııalar jáne baılanys memlekettik komıtetiniń tóraǵasy Altynbek Ismaılov, Belarýs eliniń Baılanys jáne aqparattandyrý mınıstriniń birinshi orynbasary Pavel Tkach, О́zbekstannyń Aqparattyq tehnologııalar jáne kommýnıkasııalar mınıstriniń birinshi orynbasary Oleg Pekos, sondaı-aq Ázerbaıjannyń Elektrondy úkimetti damytý ortalyǵy dırektory Farız Djafarov, «Ulttyq aqparattyq tehnologııalar» AQ Basqarma tóraǵasy Áset Turysov jáne taǵy basqalary elektrondy úkimetti damytýdaǵy óz jetistikteri men jańa mindetterdi tanystyrdy.
Jalpy, Astana Memlekettik qyzmet habynyń mıssııasy − aımaq jáne basqa elder úkimetteriniń ınstıtýsıonaldyq jáne adamı áleýetin kúsheıtýdegi kúsh-jigerin qoldaý arqyly memlekettik qyzmet tıimdiligin arttyrýǵa úles qosý.
Qazaqstan Úkimeti men BUU Damý baǵdarlamasy bastamasy aıasynda 2013 jyly qurylǵan Astana haby búgingi tańda 42 qatysýshy el men 70 ınstıtýsıonaldyq áriptesterin qamtyp otyr.