Bıtkoınnyń baǵasy 14 000 dollardan asyp tústi. Mundaı jaǵdaı 2018 jyldyń qańtarynan beri alǵash ret tirkelip otyr.
Coinmarketcap.com krıptobırjasynyń derekterine súıensek, 2020 jyldyń 31 qazanynda krıptovalıýta baǵasy birden 300 dollarǵa kóterilip, 14 027 dollardy quraǵan. Alaıda bul uzaq saqtalǵan joq, ile 13 680 dollarǵa deıin tómendedi.
Dese de, krıptovalıýtanyń shamamen úsh jyldan keıin 14 000 dollarǵa kóterilýi naryqtaǵy oıynshylardy bir serpiltip qoıdy. Sońǵy ret 2018 jyldyń qańtarynda 1 bıtkoın 14 000 dollardan joǵary somaǵa baǵalanyp edi. Jalpy, bul ónimniń baǵasy bir kezderi 20 000 dollarǵa deıin kóterilgenin jaqsy bilemiz. Al odan keıin quldyraý kezeńi bastaldy.
2020 jyldyń qazan aıynda bıtkoın shamamen 25 paıyzǵa qymbattaǵan. Sáýir aıynan beri munshalyqty ósim tirkelgen emes.
Krıptovalıýta baǵasynyń ósimine birneshe faktor áser etýi múmkin. Birinshi kezekte kompanııalar tarapynan qyzyǵýshylyqtyń artýy. Belgili bolǵandaı, qazan aıynda Square tólem servısi 4 709 bıtkoındy satyp alý úshin 50 mln dollar jumsaǵan. Budan bólek, PayPal tólem servısi paıdalanýshylarǵa krıptovalıýtamen esep aıyrysýǵa múmkindik berdi. Sonymen qatar JP Morgan banki ótken aptada tólem jasaý úshin JMP Coin sıfrlyq valıýtasyn alǵash ret paıdalanýǵa sheshim qabyldady. Sondyqtan osy faktorlardy eskergen bıtkoınnyń jaqtaýshylary mundaı ósim turaqty saqtalaryna senimdi.
Sondaı-aq ótken aptanyń AQSh qor naryǵy úshin qolaısyz bolǵanyn bilemiz. Belgili bir deńgeıde bul jaǵdaı da bıtkoınnyń ósimine áser etpeı qoıǵan joq. Máselen, Dow Jones ónerkásiptik ındeksi apta basynan beri juma kúngi saýda-sattyqtyń jabylýyna deıin 6,5 paıyz joǵaltty. AQSh-tyń eń kóp kapıtaldandyrylǵan kompanııalary kiretin S&P 500 ındeksi bir aptada 5,6 paıyzǵa tómendedi. Tehnologııalyq kompanııalardy qamtıtyn Nasdaq ındeksi 5 paıyz joǵaltty.
Eske sala keteıik, jyl basynda bıtkoınnyń baǵasy 8 000 dollardan tómen edi. Onyń bıylǵy ósimi AQSh pen Iran qaqtyǵysynyń shıelenisýine baılanysty ınvestorlardyń senimsizdiginen bastaldy. Sonymen qatar buǵan pandemııa men qor naryqtarynyń quldyraýyn, munaı baǵasynyń tómendeýin qosýǵa bolady.