Keıingi ýaqytta ınstagram jelisin qoldanýshylar arasynda kútpegen jańalyq oryn aldy. Kútpegen deýge de negiz bar. Instagram arqyly mıllıoner atanyp júrgen kóp bloger mundaı ózgeris bolatynynan úmit úzip ketip edi. Birneshe jyldan beri jahandyq trendten túspeı turǵan «foto galereıa» álemi blogerlerdiń ekinshi tynysyn ashqandaı.
Jańartýlardyń alǵashqy legi 50 000 blogerge qýanysh ákeldi deýge bolady. О́ıtkeni ınstagram osynsha adamǵa aqyly stıker taratty. Jazylýshy sany mıllıondaǵan blogerler tikeleı efır arqyly aqyly stıkerlerdi paıdalaný múmkindigine ıe boldy. Stıkerlerdiń baǵasy 0,99, 1,99 jáne 4,99 dollardy quraıdy. Satyp alǵannan keıin olar tikeleı efır chatyndaǵy paıdalanýshy atynyń janynda paıda bolady. Olardyń kómegimen kórermender tikeleı efırdegi adamǵa qoldaý kórsete alady. Bul aýyz toltyryp aıtar jańalyq bolmasa da, jasóspirimder men ınstagram fanattary úshin qýanyshty jańalyqqa aınaldy. Ásirese tanymal blogerlerge jazylýshylarynyń yqylasyn bildirer «oıynshyqqa» aınalyp úlgerdi deýge bolady.
Al ekinshi jańalyqtyń birshama mańyzdy ekenin atap ótý kerek. Endi ınstagramda chat bottaryn qurýǵa bolady. Jańartylǵan Facebook Messenger API-i batyrmalary men medıa faıldardy paıdalanyp Direct-tegi suranystarǵa avtomatty túrde jaýap berýge múmkindik týdy. Sondaı-aq bul batyrmalar korrespondensııany CRM-ge biriktirýge múmkindik beredi.
Úshinshi jańartý ınstagramda 15 sekýndyq qysqa vıdeo-jazba qaldyrýǵa qumar jandarǵa arnalypty. Árıne, olarǵa unaı qoımaıtyn jańalyq bolýy múmkin. О́ıtkeni ádette lentadan jyltyń ete qalatyn tutas jarnamalardyń orny endi Stories-Selection-ǵa aýysty. Bul – jarnamanyń jańa formaty paıda boldy degen sóz. Munyń ereksheligi de joq emes. Bir jarnamada birden birneshe ónimdi kórsetý múmkindigi qarastyrylǵan. Munda tanymal Instant Experience sııaqty shablon negizinde jarnama jasaýǵa bolady. Dese de, jańa format áli barlyq jarnama berýshilerge qoljetimdi emes. Qurastyrýshylar bul úshin azdaǵan ýaqyt kerek ekenin aıtyp otyr.