Qazaqstanda ekstrakorporaldy uryqtandyrý prosedýrasynyń qoljetimdiligi artty. Buǵan deıin kepildendirilgen tegin medısınalyq kómek sheńberinde ǵana jasalatyn joǵary tehnologııalyq qyzmettiń bul túri bıyldan bastap mindetti áleýmettik medısınalyq saqtandyrý paketine endi. Bul týraly «Áleýmettik medısınalyq saqtandyrý qory» KeAQ Almaty qalalyq fılıaly habarlady.
Jasandy uryqtandyrý – urpaq órbitýdiń álemde keń taralǵan ári eń zamanaýı tásilderiniń biri. Dúnıe júzinde 40 jyldan beri paıdalanylyp kele jatqan bul ádis Qazaqstanda 1996 jyldan bastap qoldanysqa engizilgen bolatyn. Búginde elimiz boıynsha ekstrakorporaldy uryqtandyrý tásilimen 22 myń bala dúnıege keldi. Aldy búginde ata-ana atanyp ta úlgerdi. Al bedeýlikke baılanysty tirkeýde turǵan áıelder sany 9 myńnan asady.
Fılıal dırektory Tileýhan Ábildaevtyń aıtýynsha, ekstrakorporaldy uryqtandyrý baǵdarlamasy 2010 jyldan bastap kepildendirilgen tegin medısınalyq kómek paketine engizilipti. Al jyl basynan beri engizilgen MÁMS paketi kópshiliktiń qaltasy kótere bermeıtin bul qyzmettiń qoljetimdiligin arttyryp otyr.
«2020 jyly Almaty qalasy boıynsha EKO prosedýralaryna 527,3 mln teńge bólingen. Oǵan 615 uryqtandyrý baǵdarlamasy jasalýy tıis. Búginge deıin 259 áıel atalǵan baǵdarlamaǵa qatysyp úlgerdi», deıdi fılıal basshysy.
Bıyl ońtústik astana boıynsha atalǵan baǵdarlamaǵa 5 medısına uıymy qatysyp jatyr. Olardyń bári de Medısınalyq saqtandyrý qorymen kelisimshart bekitken. Atap aıtqanda «Private clinic» JShS, «Akýsherlik, gınekologııa jáne perınatologııa ǵylymı ortalyǵy» AQ, «PERSONA» JShS, «Ekomed» fırmasy» JShS, «EKO» ortalyǵy» JShS.
«Ekstrakorporaldy uryqtandyrý ádisi – álemde beleń alyp jatqan bedeýlik problemasyna qarsy kúrestiń eń tıimdi tásilderdiń biri. Ol áıelder men erlerde kezdesetin bedeýliktiń kez kelgen túrin jeńip shyǵýǵa múmkindik beredi. Zamanaýı reprodýktıvtik tehnologııalar bala súıýden kúder úzgen adamdarǵa úmit syılaıtyn kezderi az emes», deıdi dáriger akýsher-gınekolog, reprodýktolog Anastasııa Rybına.
Onyń aıtýynsha, osyndaı jandardyń biri kvota kezegin 2 jyl kútken. Oǵan deıin birneshe ret jasalǵan uryqtandyrý baǵdarlamasynan nátıje shyqpapty. Osy baǵdarlama arqyly boıyna bala bitken kelinshek búginde ana bolýǵa daıyndalyp jatyr.
Eske sala ketsek, kvota boıynsha EKO baǵdarlamasyna qatysý úshin tirkelgen emhana arqyly arnaıy esepke turý qajet. Tıisti kórsetilimder bolǵan jaǵdaıda dárigerler kvotaǵa kezekke qoıady.