Mádenıet jáne sport mınıstrliginiń qoldaýymen, ári Ulttyq mýzeı men Ulttyq akademııalyq kitaphananyń uıymdastyrýymen qazaq halqynyń uly aqyny, aǵartýshysy Abaı Qunanbaıulynyń 175 jyldyq mereıtoıyna arnalǵan «Abaı jáne rýhanı mura» atty zamanaýı ıllıýstrasııalyq-kitap kórmesi ótti.
Kórmeniń ashylý saltanatynda sóz alǵan Ulttyq mýzeıdiń dırektory Arystanbek Muhamedıuly: «Abaı Shyǵys jáne Batys mádenıeti men órkenıetin jetik bilgen. Eki álemdi tereń zerttegen. Onyń fılosofııaǵa toly shyǵarmalary áli kúnge deıin ózektiligin joǵaltqan emes. Abaı qanshalyqty halqyn súıip, jany ashysa, halqy da sonshalyqty oǵan iltıpat bildirip, shyǵarmalaryn jatqa aıtyp, tumardaı saqtap keledi», – dedi.
Jıyn barysynda Ulttyq akademııalyq kitaphana dırektory, pedagogıka ǵylymdarynyń doktory, professor Ú.Muńalbaeva, folklortanýshy, fılologııa ǵylymdarynyń doktory, professor Sh.Ybyraev, Qazaqstan Jazýshylar odaǵy Nur-Sultan qalasy fılıalynyń dırektory D.Kápuly sóz sóılep, qazaq ádebıetiniń shoqtyǵy bıik iri tulǵasy Abaı Qunanbaıulynyń shyǵarmashylyǵyna keńinen toqtalyp, ondaǵy aıtylǵan oılardyń máni men mańyzdylyǵyn ashyp berdi.
Atalmysh kórme «Abaıdyń ómir joly», «Abaı shyǵarmashylyǵy» jáne «Abaıtaný» dep atalatyn 3 bólimnen turady. Onda abyz aqynnyń ómiri men shyǵarmashylyǵyna qatysty 2000-nan astam kitaptarmen qatar kóptegen foto jáne beınematerıaldar, tarıhı jádigerler qoıylǵan.
Aıta keteıik, «Abaı jáne rýhanı mura» atty zamanaýı ıllıýstrasııalyq-kitap kórmesin mýzeı qonaqtary bir aı boıy tamashalaı alady.