О́ńirdiń medısına mekemeleri taǵy da jańa jedel járdem kólikterimen tolyqty. Bul joly «ÝAZ» markaly 12 kólikti «Kaspıı qubyr konsorsıýmy» AQ syıǵa tartty.
Oblys ákimi Mahambet Dosmuhambetovtiń aıtýynsha, pandemııanyń ekinshi tolqynyna jan-jaqty daıyndyq jasalyp otyr. Úkimet tarapynan, ásirese medısına salasyn qajetti kóliktermen qamtamasyz etýge qoldaý kórsetildi. Naýryzda bankterdiń biri segiz jedel járdem kóligin satyp alýǵa demeýshilik tanytypty. Al bir aı buryn oblystyq jedel járdem stansasyna 22 jedel járdem kóligi berildi. Endi jyl sońyna deıin taǵy 18 kóliktiń ákelinetini josparlanýda.
– Jaqynda Inder, Isataı, Qyzylqoǵa, Maqat jáne Mahambet aýdanyna jyljymaly dıagnostıkalyq medısınalyq zerthana kesheni berildi. Qazir aýdandardaǵy dıagnostıkalyq medısınalyq keshende dárigerler kúnine 150 adamdy qabyldap, alpystan astam aýrýǵa dıagnoz qoıa alady. Oblystyq obaǵa qarsy kúres stansasy jyljymaly PTR zerthanasymen qamtyldy, – dedi oblys ákimi Mahambet Dosmuhambetov.
«Kaspıı qubyr konsorsıýmy» AQ bas dırektorynyń orynbasary Qaıyrgeldi Qabyldınniń aıtýynsha, jyl saıyn áleýmettik áriptestik aıasyndaǵy jobalarǵa 3 mln dollar bólinedi.
– Áleýmettik baǵdarlamanyń sheńberinde balabaqsha, mektep, aýrýhanalar, demalys oryndary, sport alańdary salynyp jatyr. Jyl aıaǵyna deıin medısına mekemelerine kompıýterlik tomografııa apparatyn alyp berýdi josparlap otyrmyz, – deıdi Qaıyrgeldi Qabyldın.
Jedel járdem kólikteri Qurmanǵazy, Isataı, Qyzylqoǵa, Maqat, Mahambet aýdandaryndaǵy medısına uıymdaryna beriletin boldy.
Atyraý oblysy