Maqsat-murat qos qoltyǵynan qos perishtedeı demep, jebep alǵa umtyldyrý úshin de adamǵa aıaly arman kerek eken. Birinshi toptaǵy múgedek Natalıa Kýrdıýkovany da bıikterge bastap kele jatqan, uly ómirge degen súıispenshiligin ár sát saıyn eselep, dem berip kele jatqan dál osyndaı bir názik sezim.
Qarǵa adym jer muń bolyp qalar dep kim oılaǵan. Tańy alaýlap atyp, túni manaýrap batyp, bolashaqqa degen san alýan jospar quryp, talaı bıikten kórinýge dámeli bolyp júrgen shaǵy edi. 1985 jyly Omby qalasyndaǵy temir jol kóligi ınjenerlerin daıyndaıtyn ınstıtýtty bitirgen. Eńbek jolyn endi bastap, jastyq jalynmen apyryp-japyryp jumys isteýge kirisken shaǵy. Boıynda qýat tunyp turǵandaı. Adam jany súıip istegen jumystan jalyǵar ma, tipti keıbir adamdardyń «sharshadym» degen sózin estigende tańǵalýshy edi. Adam qalaı sharshaıdy dep oılaıtyn. Joǵary oqý ornynda alǵan bilimin kúndelikti tájirıbemen ushtastyryp, kásibı sheberligin jetildire túsýge tyrysty.
Átteń ómir joly bolat joldyń boıyndaı tep-tegis emes eken. Yldıy men eńisi, óri men qyry bar ekendigin sonda ǵana túsingen. 1990 jyly qatal taǵdyrdyń jazýymen múgedek bolyp qalǵany. Tósekke tańylyp jatqanda talaı muń basty, qaıǵynyń qara aspany tumshalap, tóbesinen ketpeı qoıdy. Baıaǵy jastyq jigerdiń bulyqsyǵan bulaqtaı quıylyp turatyn tamyry sýalǵandaı. Aldynyń bári qara túnek, adam tózgisiz jaǵdaı. Túnergen tóńirekke qarap, túńilip te ketken sátteri az bolmady. Bir sát qaraýytqan kókjıektiń arǵy jaǵynan bolmashy sáýle kóringen. Ol sáýle endigi arada densaýlyǵyn túzeý úshin, kádimgi qara jerdi nyq basyp júrgen qarapaıym adamdar tárizdi pendeniń peshenesine jazylǵan yryzdyǵyn kórý úshin synaqqa kátepti qara nardaı tótep berý kerek eken.
Jambastap jatyp almaı, sportpen aınalysýǵa bekem bel býdy. Onda da on eki múshesin túgel qozǵalysqa engizetin – ústel tennısi. Dóńgelengen dúnıedeı zyr qaqqan domalaq shardy qol basyndaı qalaqpen qaǵyp alyp, qaıta serpý deni saý azamattardyń da qolynan kele bermes. Bastapqyda adam aıtqysyz qıyndyqty basynan keshirdi. Birte-birte qol jattyqqan, mashyq qalyptasty. Jaryq dúnıeniń jaqsylyǵyn kórýge de múmkindik týa bastady. Úzbeı jattyǵý arqyly shynaıy sheberlik paıda boldy.
– 1999 jyldan bastap qalalyq, oblystyq, respýblıkalyq jarystarǵa úzbeı qatysyp, jeńimpaz atana bastadym, – deıdi Natalıa Vladımırovna, – 2018 jyly Petropavl qalasynda ótken el chempıonatynda birinshi oryn ıelendim. Osy jyldyń jeltoqsan aıynda ústel tennısinen sport sheberi atandym.
Sportty serik etken jigerli jan 2017 jyldan bastap «Invataksı» qyzmetinde dıspecher bolyp jumys isteıdi. Keıde qarbalasqan sharýamen birinshi toptaǵy múgedek ekenin de umytyp ketetini bar. О́ziniń aıtýyna qaraǵanda, adamdardyń ótinishine joǵary jaýapkershilikpen qarap, muqııat bolý qashanda saýapty is.
– Taǵdyr tálkegine ushyraǵan men tárizdi adamdardyń kóp ekenin kórip júrmiz. Tek basqa túsken batpandaı aýyrlyqty boıyńdaǵy jigermen, alapat qajyr-qaıratpen ǵana jeńe alasyń, – deıdi keıipkerimizdiń ózi, – mynaý jaryq dúnıege adam bolyp kelgen soń qandaı jaǵdaıǵa ushyrasań da kádimgi adam qalpyńda qalýyń kerek. Ol úshin ótkinshi ókinishti ysyryp tastap, qatarymnan qalmaımyn dep umtylýy kerek.
Qoly bosaı qalsa, tańǵy shyqtaı móldiregen ádemi marjan taǵyp, kózdiń jaýyn alatyn keste tigedi. Ár buıymyna kórgen adamǵa oı salatyn mazmun-maǵyna syıǵyzyp, onda da sáýleli, jarqyn bolýǵa tıisti. Muńly keıip adam eńsesin tómen tartady. Ony kórgen jan ózi sııaqty ómir ókpeletken adam bolsa she? Keıipkerimizdiń paıymynsha, tórt qubylań tegis saltanatty sánmen ádiptelse, ómirge degen qushtarlyq eselep arta túspek.
Bálkim solaı da shyǵar?!.
Aqmola oblysy,
Stepnogorsk qalasy