Germanııada koronavırýstyń taralýyn tejeý úshin búginnen bastap aıdyń sońyna deıin lokdaýn rejımi engizildi, dep habarlaıdy Egemen.kz Rıa Novostıge silteme jasap.
28 qazanda GFR kansleri Angela Merkel karantın engizilgenin jarııalady. Jańa ulttyq qatań shekteý rejıminiń qajettiligin túsindire otyryp, ol densaýlyq saqtaý júıesi pasıentter sanynyń ósýine baılanysty bolsa da, birneshe aptadan keıin onyń múmkindikteri shegine jetýi múmkin dedi.
Shekteý sharalary boıynsha teatrlar men fıtnes-klýbtar jabylady, týrıstik saparlar shekteledi, tamaqtaný oryndary tek tutynýshy ózimen taǵamdy alyp ketý nemese jetkizý qyzmeti arqyly jumys isteıdi, al mektepter men balabaqshalar ashyq bolady, shashtarazdar men dúkender kelýshiler sanyn shekteı otyryp jumysyn jalǵastyrady. Kóktemde engizilgen karantın rejımimen salystyrǵanda bul joly mektepter men balabaqshalar jabylmaıdy.
1 qarashadaǵy jaǵdaı boıynsha Germanııada bir táýlikte 14,2 myńǵa jýyq koronavırýs ınfeksııasy anyqtaldy, 29 adam qaıtys boldy. Epıdemııa bastalǵaly beri Germanııada koronavırýstyń 532 930 jaǵdaıy jáne 10 481 ólim tirkeldi, 355 myńnan astam naýqas saýyǵyp ketti.