Qazaqstan Respýblıkasy Premer-Mınıstriniń orynbasary Roman Sklıardyń jetekshiligimen ortalyq memlekettik organdar basshylyǵynyń, Túrkistan oblysynyń ákimi О́mirzaq Shókeevtiń qatysýymen qazaqstandyq delegasııa О́zbekstan Respýblıkasynyń Tashkent qalasyna resmı saparmen bardy, - dep habarlaıdy Egemen.kz
Sapar barysynda О́zbekstan Respýblıkasynyń Premer-Mınıstri Abdýlla Arıpovpen, Premer-Mınıstrdiń birinshi orynbasary Achılbaı Ramatovpen, О́zbekstan Respýblıkasy Premer-Mınıstriniń orynbasary — ınvestısııalar jáne syrtqy saýda mınıstri Sardor О́mirzaqovpen kezdesý ótti.
Kún tártibindegi ózekti máseleler boıynsha eki jaqqa tıimdi ózara is-qımyl boıynsha ýaǵdalastyqtarǵa qol jetkizildi. Kezdesýlerde qazaq-ózbek strategııalyq seriktestigi álemdegi aǵymdaǵy epıdemıologııalyq jaǵdaıǵa qaramastan, dástúrli túrde joǵary deńgeıde jáne serpindi túrde damyp kele jatqany atap ótildi. Qol jetkizilgen ýaǵdalastyqtardy iske asyrý barysy men ózara tıimdi yntymaqtastyqtyń perspektıvalyq baǵyttary kezekti ret tyńǵylyqty talqylandy. Saýda-ekonomıkalyq baılanystardy nyǵaıtý maqsatynda avtomobıl jasaý, eksportty shoǵyrlandyra otyryp, aýyl sharýashylyǵy, úshinshi elderdiń naryqtarynda suranysqa ıe mýltımodaldyq jetkizilimderdi (avto/temirjol/áýe) qalyptastyrý jónindegi jobalar qaraldy.
Qazaqstan tarapy eksporttyq naryqtardyń iri saýda jelilerine shyǵý úshin aýyl sharýashylyǵy ónimin jetkilikti kólemde shoǵyrlandyrýǵa múmkindik beretin kóterme-taratý ortalyqtarynyń memleketaralyq tarmaqtalǵan jelisin qurýdy usyndy. О́z kezeginde О́zbekstan Premer-Mınıstri Termez-Mazarı-Sharıf saýda-logıstıkalyq ortalyǵy aıasyndaǵy yntymaqtastyq máselelerin qarastyrýdy usyndy.
Sapar barysynda kólik, aýyl sharýashylyǵy mashınalaryn jasaý, jeńil, farmasevtıkalyq, tamaq ónerkásibi, sondaı-aq mıkro, shaǵyn jáne orta kásipkerlik, bilim berý salalaryn qamtıtyn Praktıkalyq sharalar josparyna qol qoıyldy.