Mońǵolııada turatyn Saılaý Túkibaıqyzy Ulan-batyr qalasyna qarasty Nalaıh aýdanynda ulttyq ónerge úndeıtin jeke mýzeı ashty. Jarty ǵasyrdan beri qolónerdi janyna serik etken sheber shákirt tárbıelep, álemdik kórkem mádenıettiń negizine aınalǵan ulttyq ónerdi jastarǵa amanattamaq.
Saılaý Túkibaıqyzy 1957 jyly 17 qazanda Baıan-О́lgeı aımaǵynyń Tulba sumynynda on balaly otbasynyń tuńǵyshy bolyp dúnıege kelgen. Ol on jasynan bastap anasynan tárbıe alyp, tigin tigip, sheberlik sabaǵyn sanasyna erte sińirgen. Al 17 jasynda anasy ómirden ótip, otbasynyń bar qıynshylyǵy ákesi ekeýiniń moınyna túsipti. «Úıdiń úlkeni bolǵandyqtan kóp jaýapkershilik meniń moınymda boldy. О́mirdiń qyzyǵyn da shyjyǵyn erte kórip óstim, erte eseıdim. Artymnan ergen baýyr, sińlilerimniń bárin aıaǵynan turǵyzyp, qatarǵa qosý ońaı bolǵan joq. Osy qıyndyqtardyń bárin eńserýge anamnyń boıyma sińirgen qolóneri kóp septik boldy», deıdi sheber ájeı. О́ziniń aıtýynsha, kózimizdiń qarashyǵyndaı qasterleıtin qolónerdiń biz keste, qol keste, oıý-órneksiz tigý, toqyma túrleri, syrmaq oıý sekildi barlyq túrin meńgergen. Búginge deıin 200-den astam shákirt tárbıelep, aldy Qazaqstan, Fransııa, Japonııa sııaqty irgeli memleketterde eńbek etip júrgen kórinedi.
On saýsaǵynan óner tamǵan sheber halyqaralyq kórmelerge jáne Mońǵolııadaǵy Qazaqstan elshiligi tarapynan uıymdastyrylǵan mádenı is-sharalardyń kóbine belsene qatysyp turady. «Búginge deıin respýblıkalyq, halyqaralyq deńgeıdegi 40-tan astam kórmege qatystym. Júldeli oryndardan kórinip kelemin, memleket tarapynan da kóptegen marapat aldym. Qazaq dese bir búıregimiz buryp turady ǵoı, Qazaqstan tarapynan uıymdastyrylǵan mádenı is-sharalardyń da árdaıym basy-qasyndamyn. О́zimiz ashqan murajaıymyz bar, onda qazaqtyń barlyq turmys-tirshiligin, salt-dástúrin bolmysyn beıneleıtin qolóner buıymdary toptastyrylǵan. Sheteldik saıahatshylar mýzeıimizge jıi kelip turady. Buıymdarymyzdy qyzyǵyp satyp alyp jatady. Árıne bıylǵy pandemııaǵa baılanysty kelýshiler sany azaıdy. Aldaǵy armanym osy mýzeıdi keńeıtip, bolashaq urpaqqa mura etip qaldyrý», deıdi ol.
Halqymyzdyń baǵa jetpes qundy óneri jaıynda qazaq jáne orys tilderinde «Sheberdiń shejiresi» atty kitaby da jaryq kórgen. Atalǵan eńbegi úshin Saılaý Túkibaıqyzy «Mońǵolııa eliniń ozat sheberi» tósbelgisimen marapattalypty. Ulttyq qundylyqtardy órkendetý jolynda yjdaǵatty is atqaryp júrgen kónekóz sheber qaıta túleýdiń qaınar kózindeı názik talǵammen jetkizip qana qoımaı, ujymdyq bastamaǵa aınaldyryp otyr.