Qory qundy kartınalarǵa baı oblystyq óner mýzeıiniń qurylǵanyna otyz jyl toldy. Abaıdyń 175 jyldyǵymen tuspa-tus kelgen mádenı mekemeniń mereıli datasyna oraı jýyqta «Ýaqyt talabymen» atty saltanatty shara ótti.
Sanıtarlyq talaptardy saqtaı otyryp uıymdastyrylǵan shara aıasynda mýzeıdiń qoryndaǵy boıaýy kóne sýretter kórermen nazaryna usynyldy. Onyń ishinde qazaq beıneleý óneriniń atasy Ábilhan Qasteevtiń, alǵashqy býyn sýretshileri Úki Ájıevtiń, Evgenıı Sıdorkınniń, Janataı Shardenovtiń, sonymen qatar ótken ǵasyrdyń alpysynshy jyldarynda ulttyq beıneleý óneri mektebin qalyptastyrǵan sýretshilerdiń týyndylary qoıyldy. Atap aıtsaq, Salıhıtdın Aıtbaev, Shaımardan Sarıev, Maǵaýııa Amanjolov, Baqtııar Tabıev, Sahı Romanov sekildi qylqalam sheberleriniń túpnusqa týyndylary kórme zalynan oryn tapqan.
О́ner súıer qaýym ásirese Ábilhan Qasteevtiń «Esik» kólin beınelegen kartınasynan kóz ala almady. Týyndy 1969 jyly qaǵazǵa akvarelmen beınelenipti. Kartınada tús mezgilinde kóldi qaıyqpen qaq jaryp, júzip kele jatqan adamdar kórinis tapqan. Bul baǵaly shyǵarma búginde О́skemendegi óner mýzeıinde saqtaýly tur.
Mýzeıde burynǵy sýretshilerdiń kartınalary ǵana emes, Esenǵalı Sadyrbaev, Nıkolaı Ashtema syndy qazirgi sýretshilerdiń de qoltańbalary toptastyrylǵan.
Shyǵystaǵy óner mýzeıi beıneleý, ádebıet jáne mýzyka baǵytymen erekshelenedi. О́nertanýshylardyń aıtýynsha, munda jınaqtalǵan mýzyka men ádebıettiń baı qorlary áli zerttele qoımaǵan. Jalpy, mýzeıde uzyn sany on myńǵa jýyq eksponat bar. Olardyń basym bóligi grafıka, keskindeme, músin, sándik-qoldanbaly ónerdiń túrlerinen jınaqtalǵan.
Saltanatty is-sharaǵa mýzeımen tyǵyz baılanysty sýretshiler, aqyndar, mýzykalyq birlestikterdiń ókilderi, qalanyń mádenı mekemeleriniń qyzmetkerleri de shaqyryldy. Eldegi jaǵdaıǵa baılanysty kele almaǵan sýretshiler, mýzeıdiń burynǵy qyzmetkerleri ekran arqyly júrekjardy quttyqtaýlaryn joldady.
О́SKEMEN