Batys Qazaqstan oblysynda "Ashyq bıýdjet" jobasy júzege asa bastady. Joba aıasynda mekemelerdiń memlekettik satyp alý josparyna monıtorıng jasalyp, bıýdjet qarjysyn únemdeýge múmkindik týdy. Osyndaı jolmen jaqynda Shyńǵyrlaý aýdandyq mádenıet bólimi 57 myń teńgeden astam qarjy únemdedi, dep habarlaıdy Egemen.kz.
Bul jóninde Qazaqstan Respýblıkasy Sybaılas jemqorlyqqa qarsy is-qımyl agenttigi Batys Qazaqstan oblystyq departamenti Prevensııa jáne parasattylyq basqarmasynyń basshysy Birjan Haırýllın habarlady.
"Halyq únine qulaq asatyn memleket" tujyrymdamasyn qalyptastyrý jáne damytý jolynda memlekettik organdar men azamattyq qoǵamnyń kúsh-jigerin biriktirý óte mańyzdy", deıdi basqarma basshysy.
Bıyl qyrkúıek aıynda Qazaqstan Respýblıkasynyń Sybaılas jemqorlyqqa qarsy is-qımyl agenttigi, Nıderland Koroldiginiń Qazaqstan Respýblıkasyndaǵy elshiligi, "Qazaqstandaǵy parlamentarızmdi damytý qory" qoǵamdyq qory jáne "Talap" qoldanbaly zertteýler ortalyǵy 2020-2021 jyldarǵa arnalǵan "Ashyq bıýdjet" jobasynyń Jarǵysy bekitilgen bolatyn.
Osy oraıda "Ashyq bıýdjetterdiń" ınteraktıvti kartasy www.publicbudget.kz elektrondyq júıesi bıýdjet qarajatynyń tıimdi jumsalýyna qoǵamdyq monıtorıng júrgizý úshin qolaıly qural bolǵan.
Máselen qazir "Ashyq bıýdjetterdiń" ınteraktıvti kartasynda Batys Qazaqstan oblysyndaǵy 1030 memlekettik mekemeniń bıýdjeti jarııalanǵan.
Bul bıýdjet qujattaryn sybaılas jemqorlyqqa qarsy departament qyzmetkerleri zerdelep, qarap otyrady. Monıtorıng barysynda satyp alynatyn taýar baǵalary qadaǵalanady.
"Shyńǵyrlaý aýdandyq mádenıet, tilderdi damytý jáne dene shynyqtyrý bólimi qarasha aıynda keńselik qaǵaz satyp alý úshin 164 300 teńge qarastyrǵan eken. Atap aıtqanda aýdandyq bólim 106 býma keńselik qaǵazdyń árbýmasyn 1550 teńgege satyp alýdy josparlaǵan. О́ńirdegi qaǵazdyń kóterme baǵasy zerdelengen soń, bıýdjet josparyna ózgeris engizildi. Qaǵazdyń 1 býmasynyń baǵasy 1 071 teńge dep belgilendi. Satyp alynatyn taýar sany da 106-dan 100-ge azaıtylyp, nátıjesinde 57 200 teńge bıýdjet qarajaty únemdeldi", delingen departament taratqan baspasóz paraǵynda.
Búginde kez kelgen adam www.publicbudget.kz saıtynan ózin qyzyqtyrǵan memlekettik organ nemese uıymnyń bıýdjet qarajatyn bólýi, ony ıgerýi týraly málimetpen tanysa alady.
Batys Qazaqstan