Senator Álı Bektaev Túrkistan qalasynyń ınfraqurylymyn damytý boıynsha birqatar máselelerge qatysty Úkimet basshysy Asqar Mamınge depýtattyq saýal joldady, dep habarlaıdy Egemen.kz Senattyń baspasóz qyzmetine silteme jasap.
Senat depýtaty sońǵy jyldary Túrkistan qalasy qarqyndy damyp kele jatqanyn erekshe atap ótti. Degenmen sheshimin kútken birqatar máseleler bar ekenin de aıtty.
«Túrkistan qalasynda salynyp jatqan kórkem ǵımarattardyń kópshiligin aýyz sýmen, káriz júıesimen, elektr jelilerimen, jylý júıelerimen qamtamasyz etý sheshilmegen. Qala kósheleriniń ırrıgasııalyq júıeleri men ınjenerlik-ınfraqurylymdaryna qarjy jetkilikti deńgeıde qaralmaǵan. Infraqurylymy sheshilmegen ǵımarattarǵa, turǵyn úılerge turǵyndardy qalaı ornalastyrýǵa bolady, sol ǵımarattardyń jumys isteýi múmkin be? Erteń ınfraqurylymdardy qaıta júrgizgen ýaqytta salynǵan joldar men kósheler qaıta buzylmaı ma?» - dep saýal tastady depýtat.
Ol qalany abattandyrý jumystaryn da qurylys jobalarymen bir mezgilde júrgizýdi usyndy. Sondyqtan 2021-2023 jyldarǵa arnalǵan Respýblıkalyq bıýdjetti qaraý barysynda «Turkistan» arnaıy ekonomıkalyq aımaǵynyń ınfraqurylymyna; kópqabatty turǵyn úılerdi sýmen qamtamasyz etý men káriz júıelerine; elektr qýatymen qamtamasyz etý úshin qosalqy stansııa salýǵa; turǵyn úılerdi jylýmen qamtamasyz etýge; jańadan salynyp jatqan qala aýmaǵyn abattandyrýǵa; qaladaǵy jańa turǵyn úı alabyna ınjenerlik-ınfraqurylymdardy júrgizýge; «Áziret Sultan» qoryq-murajaıynyń aınalasyn abattandyrýǵa qarajat bólýdi surady.