Bıznesti qoldaý sharalary aıasynda bankter ekonomıkanyń zardap shekken salalaryndaǵy kásipkerlerdiń nesıesin qaıta qarjylandyryp otyr, dep habarlaıdy Egemen.kz.
Karantın kezinde tabysynan aıyrylǵan nemese shyǵynǵa ushyraǵan 6000-ǵa jýyq kásipker nesıesin qaıta qarjylandyra alady.
Buǵan deıin Qazaqstan Úkimeti bekitken "Jeke kásipkerlikti memlekettik qoldaýdyń keıbir sharalary týraly" qaýlyǵa engen ózgeristerge sáıkes, "Damý" kásipkerlikti damytý qory" AQ nesıeni qaıta sýbsıdııalaý boıynsha jumys bastady.
Prezıdent Qasym-Jomart Toqaevtyń bıylǵy 1 qyrkúıektegi Joldaýy barysynda aıtylǵan tapsyrmasy boıynsha, shaǵyn jáne orta bızneske memleket tarapynan qosymsha qoldaý kórsetilip, nesıeler jeńildetilgen sharttarmen qaıta qarjylandyryla (sýbsıdııalaý) bastady. "BJK-2025" bıznesti qoldaý baǵdarlamasyna bekitilgen ózgeristerge sáıkes, COVID-19 pandemııasy men karantın shekteýleri kezinde zardap shekken kásipkerler 2020 jylǵy 31 tamyzǵa deıin bankten alǵan nesıeleri men lızıng mámileleri boıynsha syıaqy mólsherlemesiniń bir bóligin "Damý" kásipkerlikti damytý qory" AQ arqyly sýbsıdııalaı alady.
Qaýlyda ekinshi deńgeıli bankterge ótinish berý merzimi bıylǵy 30 qazanǵa deıin dep kórsetilgen. Ol boıynsha "Damý" Qory bankter bergen tizilimder men saýalnama-ótinishter negizinde 5 jumys kúninen aspaıtyn merzim ishinde sýbsıdııalaý múmkindigi týraly sheshim qabyldaıdy.
Qazir bankter kásipkerlerden qaryzdaryn sýbsıdııalaý úshin kelip túsken 5921 saýalnama-ótinishti "Damý" Qoryna berdi. 3574-nan astam ótinish qaralyp, "memlekettik qoldaý sharalaryn alý úshin qoıylatyn shart talaptaryna sáıkes keledi" degen oń sheshim qabyldandy.
Osy qoldaýdy paıdalana alatyn kompanııalar men kásiporyndar qatarynda bólshek saýda, qonaq úı bıznesi, týrıstik agenttikter, kınoteatrlar, fıtnes-ortalyqtar, kólikke tehnıkalyq qyzmet kórsetý jáne jóndeý, mektepke deıingi jáne bastaýysh bilim berý jáne t.b. salalarda jumys isteıtin ShOB sýbektileri bar. Jalpy tizbege 29 qyzmet túri engizilgen.
Osy memlekettik qoldaý sharasy 2020 jylǵy 16 naýryzdan bastap 2021 jylǵy 15 naýryzǵa deıingi sýbsıdııalaý kezeńine arnalǵan. Qoldaý sharttary boıynsha, kásipker nomınal syıaqy mólsherlemesiniń 6%-yn ǵana tóleıdi. Al kredıt/lızıng mámile boıynsha nomınal syıaqy mólsherlemesi men kásipker tóleıtin mólsherleme arasyndaǵy aıyrmany memleket qarjy agenti – "Damý" Qory arqyly óteıdi.
Bankter qaryz alýshylardy ótinimniń maquldanǵany týraly habardar etedi. Resimdeý sharýalaryn aıaqtaý úshin kásipker bankke buryn berilgen ótinish negizinde banktik qaryz shartyn nemese qoldanystaǵy sharttarǵa qosymsha kelisim jasasý úshin nesıe bergen bankke júginýi qajet. Bul rette, sýbsıdııalanatyn qaryzdar boıynsha 6%-dan asatyn paıyzdyq syıaqyny óteý úshin artyq tólengen soma kásipkerge bankke aqsha aýdarý arqyly óteledi. Ony boryshker keıinnen osy nesıeniń paıyzyn óteý úshin paıdalana alady. Soma qalǵan jaǵdaıda ol boryshkerge qaryz merziminiń sońynda tólenedi. "Damý" Qory maquldaǵan jáne banktermen qosymsha kelisimge qol qoıylǵan kúnnen bastap sýbsıdııalanatyn qaryzdar boıynsha kezekti tólemderdi kásipker tómendetilgen mólsherleme boıynsha engizedi.