Nur-Sultan qalasynda karantın rejımin buzýdyń 2 029 faktisi anyqtaldy, – dep habarlaıdy Egemen.kz Polisia.kz saıtyna silteme jasap.
Qabyldanyp jatqan sharalarǵa qaramastan keıbir oıyn-saýyq mekemeleri men qoǵamdyq tamaqtaný obektileri sanıtarlyq-epıdemıologııalyq talaptardy buzyp, azamattardyń densaýlyǵyna qaýip tóndire otyryp tyıym salynǵan ýaqytta karantındik sharalardy óreskel buzýda.
Osylaısha, 4 qarashada mobıldi top Jeke batyr kóshesinde ornalasqan “Tekkıla” bar anyqtaǵan. Atalǵan dámhana jumys jáne demalys kúnderi saǵat 09.00-den bastap 22.00-ge deıin bekitilgen kesteni saqtamaı qyzmet kórsetken.
Sondaı-aq meıramhanalarda kóptegen qonaq shaqyryp, otbasylyq is-sharalar ótkizý úderisi baıqalady. Mysaly, 25 qazanda Sembınov kóshesinde ornalasqan “Sunqar” meıramhanasynda 50-den astam kelýshi bolǵan, “Qalja” toıy atalyp ótken. Karantın rejımin buzýdyń 2 029 faktisi anyqtalǵan.
– túngi klýbtar, meıramhanalar, dámhanalar – 796;
– dúkender, saýda ortalyqtary, bazarlar – 474;
– shashtarazdar, sulýlyq salondary, saýnalar – 220;
-saıabaqtar, skverler, demalys oryndary, sý aıdyndary janynda – 29;
– merkelik jáne eske alatyn is-sharalar – 12;
– basqa oryndarda – 480;
Betperde rejımin saqtamaýdyń 213 faktisi anyqtalǵan.
"Anyqtalǵan shekteý sharalaryn buzý boıynsha materıaldar Nur-Sultan qalasynyń Taýarlar men qyzmetterdiń sapasy men qaýipsizdigin baqylaý departamentine joldandy. Biz azamattarmen koronavırýs ınfeksııasynyń taralýyna jol bermeý boıynsha karantın rejımin saqtaý týraly túsindirý jumystaryn júrgizýdi jalǵastyrýdamyz. Saıabaqtar men skverlerde, bazarlarda saqtaný kerek ekenin eske salamyz jáne azamattardy sanıtarlyq normalar men áleýmettik qashyqtyqty mindetti túrde saqtaýǵa shaqyramyz. Qala turǵyndarymen jáne qonaqtarymen 54 342 profılaktıkalyq áńgime jumystary júrgizildi", delingen habarlamada.