Qazaqstan Respýblıkasynyń Memlekettik hatshysy Qyrymbek Kósherbaevtyń tóraǵalyǵymen Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń kezekti otyrysy ótti.
Komıssııa jumysyna Parlament depýtattary, ortalyq jáne jergilikti atqarýshy organdardyń basshylary, belgili qoǵam qaıratkerleri men ǵalymdar qatysty. Komıssııa otyrysynyń jumysy selektorlyq baılanys arqyly uıymdastyryldy.
Otyrysty ashqan Qyrymbek Kósherbaev memlekettik rámizderdiń qazaqstandyq biregeılikti, otansúıgishtik sezim men halyq birligin qalyptastyrýdaǵy mańyzynyń arta túskenine toqtaldy.
– Otandy qasterleý memlekettik rámizderge degen qurmetten bastalady. Memlekettik rámizder – el ishindegi turaqtylyqtyń nyshany, ulttyq rýh pen qoǵamdyq kelisimniń jáne patrıottyq tárbıeniń asa mańyzdy quraly, – dep atap ótti Qyrymbek Kósherbaev.
Jıynda Qazaqstan Prezıdentiniń tapsyrmasyna sáıkes memlekettik rámizder salasyndaǵy zańnamalarǵa ózgerister men tolyqtyrýlar engizý, jańadan qurylǵan geraldıkalyq ortalyqtyń jumysy, sonymen qatar, Qazaqstan Respýblıkasy Ishki ister mınıstrligindegi memlekettik rámizderdi dáripteý jáne qoldaný salasy boıynsha jumystardyń jaı-kúıi talqylandy. Sondaı-aq Respýblıkalyq komıssııanyń 2021 jylǵa arnalǵan jumys jospary bekitildi.
Komıssııa otyrysynyń qorytyndysy boıynsha Memlekettik hatshy Qyrymbek Kósherbaev ortalyq jáne jergilikti memlekettik organdarǵa birqatar naqty tapsyrma berdi.