Nur-Sultanda "NUR-SULTAN DEBAT CUP 2020" pikirsaıys týrnıriniń jeńimpazdary marapattaldy, dep habarlaıdy Egemen.kz ákimdiktiń baspasóz qyzmetine silteme jasap.
Jeńimpazdarǵa arnaıy sertıfıkattar, qarjylaı syılyq jáne baǵaly zattar tabystaldy.
"Qashan da pikirsaıys dúnıesi adamnyń órisine, oı jetegine baılanysty bolady. О́zderińizdeı jastar osyndaı aksııalarǵa qatysyp bıikterden kórinýi úlken mártebe. Memleket basshysy aıtqandaı, elimizdiń bolashaǵy - jastar. Sol sebepten de osy jerden toqtamaı, aldaǵy tańda osyndaı pikirsaıys týrnırlerin jıi uıymdastyryp, júzden júırik, myńnan tulparlardy anyqtap, alǵa qaraı umtyla berý qajet. Aldaǵy ýaqytta bolashaq bizdiń kóshbasshylarymyz ben bolashaq zııatkerlerimizge tek qana sáttilik tileımin", dedi Parlament Májilisiniń depýtaty Gennadıı Shıpovskıh.
Pikirsaıys 12 qazanda bastalyp, 25 qazanǵa deıin sozylǵan. Týrnırge Nur-Sultan qalasynyń 16 joǵary oqý oryny jáne 35 orta arnaýly oqý oryndarynyń stýdentteri qatysqan.
"Biz damýshy demokratııalyq elderdegi pikirsaıys ınstıtýtyndaı bola alamyz jáne qazir jasap jatqan dúnıelerińiz soǵan bir qadam jaqyndata beredi. Sizderge tek qana sáttilik! Sizderden bolashaq saıasatkerler shyǵatynyna senimdimiz", dedi Ulttyq Pikirsaıys Federasııasynyń prezıdenti Bolat Buharbaı.
Pikirsaıys QR Konstıtýsııasynyń, Qazaqstan halqy Assambleıasynyń 25 jyldyǵyna arnalǵan. Shara barysynda Abaı Qunanbaıulynyń 175 jyldyǵy, ál-Farabıdiń 1150 jyldyǵy, Tuńǵysh Prezıdent kúni, Táýelsizdik kúnine oraı taqyryptar qozǵalǵan.
Aıta ketý kerek, týrnır ZOOM alańynda onlaın-rejımde ótti.