Beısenbi kúni Parlament Májilisiniń depýtaty Qýanysh Sultanovtyń tóraǵalyq etýimen Qazaqstan Prezıdenti janyndaǵy Adam quqyqtary jónindegi komıssııanyń keńeıtilgen otyrysy bolyp ótti.
Beısenbi kúni Parlament Májilisiniń depýtaty Qýanysh Sultanovtyń tóraǵalyq etýimen Qazaqstan Prezıdenti janyndaǵy Adam quqyqtary jónindegi komıssııanyń keńeıtilgen otyrysy bolyp ótti.
Onda elimizdiń Eńbek jáne halyqty áleýmettik qorǵaý mınıstrligi men onyń aýmaqtyq organdarynyń múgedekterdiń quqyqtaryn qamtamasyz etýdegi qyzmeti talqylandy. Komıssııa jumysyna Qazaqstannyń zań shyǵarýshy, atqarýshy jáne sot tarmaqtary organdarynyń ókilderi, advokattar, quqyqtanýshy ǵalymdar, halyqaralyq jáne úkimettik emes quqyq qorǵaý uıymdarynyń, halyqty áleýmettik qorǵaý uıymdarynyń músheleri qatysty.
Otyrys barysynda Eńbek jáne halyqty áleýmettik qorǵaý mınıstri Tamara Dúısenova sóz alyp, kún tártibine qoıylǵan másele tóńireginde áńgime qozǵady. Sondaı-aq, jıyn aıasynda múmkindigi shekteýli jandardyń quqyqtaryn qorǵaý salasyndaǵy zańnamaǵa jáne quqyq qoldaný tájirıbesin jetildirý salasyna qatysty mańyzdy máseleler talqylanyp, pikir almasyldy.
Otyrysqa qatysýshylar qamkóńil jandardyń quqyqtaryn qamtamasyz etýde kezdesetin túıtkilderdi sheshý tek vedomstvolyq mindet emestigin, bul bıliktiń barlyq tarmaqtarynyń azamattyq qoǵam ınstıtýttarymen ózara tyǵyz is-qımylyn talap etetinin atap ótti. Bul rette, Adam quqyqtary jónindegi komıssııa músheleri múmkindikteri shekteýli azamattardy memlekettik bıliktiń ókiletti organdaryna saılaý jáne saılanýy týraly Konstıtýsııalyq quqyqtaryn iske asyrý maqsatynda saıası partııalarǵa múgedekterdi óz qatarlaryna tartýdy usyndy. Sondaı-aq, olar qamkóńil jandardyń memlekettik qyzmetke qoljetimdiligin qamtamasyz etýde olarǵa tıisti kvotany zańnamalyq turǵyda belgileý qajettigine nazar aýdardy.
Otyrysta Adam quqyqtary jónindegi komıssııanyń hatshysy Tastemir Ábishev Adam quqyqtarynyń jalpyǵa ortaq deklarasııasynyń qabyldanýynyń 65 jyldyǵyna jáne Halyqaralyq adam quqyǵy kúnine arnalǵan is-sharalar týraly baıandap berdi.
Al komıssııa otyrysynda qabyldanǵan usynystar tizbesi Memleket basshysynyń, Qazaqstan Parlamenti men Úkimetiniń qaraýyna jiberiletin bolady.
Láıla EDILQYZY,
«Egemen Qazaqstan».