Ishki ister mınıstrliginiń aptalyq baspasóz máslıhatynda vedomstvo basshysy Erlan Turǵymbaev Memleket basshysynyń «Jańa jaǵdaıdaǵy Qazaqstan: is-qımyl kezeńi» atty Qazaqstan halqyna Joldaýynda aıtylǵan tapsyrmalardy iske asyrý barysy týraly baıandady. Sondaı-aq mınıstr ishki ister organdarynyń osy jyldyń toǵyz aıyndaǵy qyzmetin qorytyndylady.
Vedomstvo basshysynyń aıtýynsha, elimizdegi qylmys sany 37%-ǵa azaıyp, aýyr qylmystardyń ishinde densaýlyqqa zııan keltirý qylmystary – 12%-ǵa, zorlyq – 39%-ǵa, qaraqshylyq – 52%-ǵa, tonaý – 50%-ǵa, buzaqylyq faktileri 45%-ǵa tómendepti.
– Jasóspirimder arasyndaǵy qylmys azaıdy. Kóshede jasalatyn qylmys – 51%-ǵa, mas kúıde jasalatyn qylmys – 16%-ǵa azaıyp otyr. Qylmysty ashý kórsetkishi jaqsardy. Aýyr qylmystardyń 64%-y, asa aýyr qylmystardyń 94%-y ashyldy. Sonymen qatar karantın kezinde úıde otyryp, alkogoldik ishimdikter ishý faktileri kóbeıgen. Sonyń saldarynan turmystyq qylmystardyń sany ósti. Ishimdik áserinen adam óltirý faktileri – 12%-ǵa, jasóspirimderge qatysty zorlyq faktileri 19%-ǵa artyp otyr. Kóp jaǵdaıda jábirlenýshiniń jaqyn tanysy nemese týysy zorlaǵany anyqtalyp otyr. Olar – ákesi, ógeı ákesi, kórshisi nemese tanystary. Mundaı árbir fakti – otbasy úshin úlken tragedııa. Jaǵdaıdy durystaý úshin profılaktıkalyq sharalar kúsheıtilip, esepte turǵan azamattarmen jumys júrgizildi, – dedi E.Turǵymbaev.
Mınıstrdiń aıtýynsha, otbasyn qorǵaý úshin ýchaskelik ınspektorlar 61 000 qorǵaý nusqamasyn shyǵarypty. Sondaı-aq elimizdegi qylmystyq jaǵdaı 29 qazanda Memleket basshysy Qasym-Jomart Toqaevtyń qatysýymen ótken Ishki ister mınıstrliginiń alqa otyrysynda baıandaldy. Atalǵan otyrysta Prezıdent qoǵamdyq qaýipsizdikti saqtaýda polısııa qyzmetkerleriniń jumysy mańyzdy ekenin aıtyp, vedomstvonyń aldyna naqty tapsyrmalar qoıǵan bolatyn.
– Memleket basshysy eń aldymen qoǵamdaǵy tártiptiń saqtalýyn tapsyrdy. Prezıdent ultaralyq kelisim men qoǵamdaǵy turaqtylyq – eń basty qundylyq ekenin alǵa tartty. Adamdar óz qaýipsizdikteri úshin alańdamaýy kerek. Búginde Ishki ister mınıstrligi áleýmettik daý-damaılar men qoǵamdyq tynyshtyqty buzýdyń aldyn alý boıynsha barlyq qajetti sharalardy qabyldap jatyr. Qyzmettiń servıstik modeli engizilýde. Turǵyndardyń qaýipsizdigin qamtamasyz etý máselesi de jolǵa qoıyldy. Patrýldik polısııanyń jumysy kóshelerde, baqtarda, aýlalarda, adamdar kóp jınalatyn oryndarda qaýipsizdiktiń saqtalýyn qamtamasyz etýge baǵyttalyp otyr. Ákimdiktermen birlesip krımınogendi aýdandarda Japonııa, Ońtústik Koreıa jáne Sıngapýr elderiniń tájirıbesi boıynsha arnaıy stasıonarlyq beketter qoıylyp jatyr. Ol jerde polısııa qyzmetkerleri táýlik boıy qylmystardyń aldyn alyp, azamattardy qabyldaı alatyndaı jaǵdaı jasalǵan. Búginde aımaqtarda osyndaı 44 beket ornatylǵan. Aldaǵy eki jylda dál osyndaı 176 beket ornatý kózdelip otyr, – dedi E.Turǵymbaev.
Vedomstvo basshysynyń aıtýynsha, ýchaskelik ınspektorlardyń mártebesin zańnamalyq turǵyda kóterý jumystary júrgizilýde. Prezıdent óz sózinde «qylmystyń aldyn alatyn negizgi tulǵa – ýchaskelik ınspektor» dep atap ótken bolatyn. Ol jergilikti halyqtyń problemalaryn sheship, qylmystardyń jolyn kesip, azamattardyń qaýipsiz bolýyn qamtamasyz etýi kerek. Sondyqtan ýchaskelik ınspektorlardyń quzyretin arttyrý jumystary áli de jalǵasatyn bolady.
– Olarǵa zańnamalyq turǵyda ózdigimen tyıym salýǵa, tártip buzǵan azamattarǵa shekteý qoıýǵa quzyret berý josparlanýda. Máselen, ýchaskelik ınspektor janjal shyǵarǵan otbasy múshesin úıden shyǵaryp jibere alady. Sondaı-aq ýchaskelik ınspektor sheshim qabyldaı alatyndaı baptardyń sanyn arttyrý kózdelýde, – dedi vedomstvo basshysy.