Batys Qazaqstan oblysynda 2020 jyldyń sońyna qaraı sportpen turaqty aınalysýshylardyń sany oblys turǵyndarynyń 32 paıyzyna jetedi. О́ńirde buqaralyq sportty josparly damytý, deneshynyqtyrý keshenderiniń qoljetimdi bolýy osyndaı oń nátıjege jetkizedi.
Batys Qazaqstan oblysynyń dene shynyqtyrý jáne sport basqarmasynyń basshysy Qaımen Esendııarovtyń aıtýynsha, sport salasyndaǵy qordalanǵan máselelerdi sheshý úshin óńirde birshama jumys atqarylǵan. Ol Prezıdent Qasym-Jomart Toqaev bıylǵy Joldaýynda jas urpaq tárbıesine, buqaralyq sport pen dene shynyqtyrý, ásirese balalar sportyna erekshe kóńil bólý qajettigin aıtqanyn eske saldy.
Qazir sport salasyndaǵy ózekti máseleniń biri – aýdandarda sport ınfraqurylymyn damytý. Aýyldyq jerge sport mamandaryn, ádiskerler men jas jattyqtyrýshylardy tartý da qıyn. Shynynda da aýyldarda sport zaldary tapshy, sportpen aınalysý úshin qajetti jaǵdaı joq ekeni, sporttyq qural-jabdyqtyń jetkiliksizdigi ras. Osy olqylyqty joıý úshin 2020-2021 jyldar ishinde «Qarashyǵanaq Petroleým Opereıtıng B.V.» kompanııasynyń ınvestısııasy esebinen oblystyń 7 aýdanynda 8 dene shynyqtyrý-saýyqtyrý keshenin salý kózdelgen edi. Qazirdiń ózinde bul keshenderdiń birazy paıdalanýǵa berildi. Bıylǵy 22 mamyrda Jańaqala aýylynda 160 kórermendik orny bar dene shynyqtyrý-saýyqtyrý kesheni tapsyryldy. Oral qalasynda da sport ınfraqurylymyn damytý máselesi oń sheshilip jatyr. Bıyl memleket esebinen qala boıynsha 6 sporttyq alań salynyp, iske qosyldy. Jalpy oblys boıynsha 32 sporttyq alań salynǵan.
Bir qýanarlyǵy, oblysta jeke kásipkerlerdiń sporttyq nysandar salýy kóbeıdi. Mysaly, bıyl qyrkúıek aıynda kásipker Alpamys Qamalov Oral qalasynyń «Qus fabrıkasy» aýmaǵynda jańa sport zalyn ashty. Kásipker Tólegen Dosbolatov 10-shaǵynaýdanda jańa sport ǵımaratyn iske qosty. Grek-rım kúresinen balalar tárbıeleıtin bul sport klýbyna Qazaqstan Respýblıkasyna eńbegi singen jattyqtyrýshy M.Jumashevtiń esimi berildi. Batys Qazaqstan oblysynyń ústel tennısi federasııasynyń prezıdenti, «Medısınalyq ortalyq» JShS baqylaý keńesiniń tóraǵasy Rafhat Istaev «Omega» shaǵynaýdanynda sport zalyn saldy. Kásipker Danııar Ǵabdýllın de kólemi 3 myń sharshy metr quraıtyn Omega Sports zamanaýı sport keshenin salyp jatyr. Jeke kásipker Q.Rahmetovanyń Atoıan stadıony janynan salǵan eki qabatty sporttyq nysany da bıyl aıaqtaldy. Qazir munda «Múmkindigi shekteýli adamdarǵa arnalǵan sport klýby» músheleri jattyǵyp júr. Sporttyq ǵımaratta jeńil atletıka, qol kúresi, dzıýdo, grek-rım kúresi, erkin kúres, paýerlıftıng, doıby, shahmat, toǵyzqumalaq, ústel tennısi syndy sport túrlerimen aınalysýǵa múmkindik jasalǵan. Buǵan deıin olar azyp-tozǵan, jylytý júıesi isten shyqqan «Zenıt» zaýytynyń zalynda júrgen edi.
– 2019 jyly Batys Qazaqstan oblysynda 181 myńǵa jýyq adamnyń qatysýymen 3 993 is-shara ótti. Bıyl, árıne karantın óz áserin tıgizdi. Degenmen 8 aı ishinde 50 289 adamnyń qatysýymen 984 is-shara ótkizdik. Sonyń 726-sy aýyldyq jerde ótip, oǵan 21 581 adam qatysqan. Buǵan qosa 307 shara onlaın rejimde qashyqtan uıymdastyrylǵan, – deıdi Q.Esendııarov.
Basqarmanyń esebi boıynsha 2019 jyly óńirde dene shynyqtyrýmen jáne sportpen turaqty shuǵyldanýshylardyń jalpy sany 204 968 (31%) adam bolsa, 2020 jyldyń sońyna deıin olardyń sanyn 32%-ǵa jetkizý kózdelgen.
Batys Qazaqstan oblysynda kúni búgin balalar men jasóspirimderdiń 23 sport mektebi bar. Munda 12 674 jasóspirim 49 sport túrimen shuǵyldanady.
2019 jyly Japonııanyń Nomı qalasynda ótken sporttyq júristen Azııa chempıonatynda oraldyq Georgıı Sheıko kúmis júldeni ıelenip, qazaqstandyq sportshylar arasynan birinshi bolyp Tokıo qalasynda ótetin HHHII jazǵy Olımpııa oıyndaryna joldama utyp aldy. Sý dobynan Qazaqstan Respýblıkasy Ulttyq qurama komandasynyń qaqpashysy, oraldyq Pavel Lıpılın de – joldama ıegeri.
О́ńirde buqaralyq sportty damytý baǵytynda atqarylǵan ıgi istiń biri – Jekpe-jek sporty túrlerinen olımpıada rezerviniń mamandandyrylǵan balalar men jasóspirimder mektebi jańa qonysqa kóshti. Bul sport uıymynda kúrestiń san túri bar. Munda sambo kúresinen álem chempıondary Erbolat Baıbatyrov, Nurbol Serikov, Temirlan Ihsanǵalıev, jastar arasynda Erasyl Baqyt, grek-rım kúresinen jastar arasynda Artýr Úmbetqalıev jáne basqalary tárbıelengen. Jaqynda osy mekeme burynǵy «Arman» sport keshenine kóshirilip, jas sportshylardyń tolyqqandy jattyǵýyna jaǵdaı jasaldy.
– Keler jyly sport salasyn sıfrlandyrý maqsatynda «Meteor» elektrondy sport baǵdarlamasyn engizý qarastyrylyp jatyr. Baǵdarlamada sport nysandarynyń, jattyqtyrýshylardyń, federasııalardyń, tóreshilerdiń, balalar kontıngentiniń, barlyq issapar týraly aqparattyń biryńǵaı esebi júrgiziledi, – deıdi Q.Esendııarov.