Ekologııa, geologııa jáne tabıǵı resýrstar mınıstri Maǵzum Myrzaǵalıev 2021 jyly Qazaqstannyń jańa Sý kodeksi ázirlenetinin málim etti, dep habarlaıdy Egemen.kz
"Kóptegen sarapshynyń baǵalaýynsha, sý zańnamasy odan ári jetildirýdi talap etedi. Qoldanystaǵy kodekske on jeti jyl ishinde 62 ret ózgerister men tolyqtyrýlar engizildi. Nátıjesinde quqyq qoldaný rettiliginiń joǵalýy baıqalady. Bul tutastaı alǵanda sý sharýashylyǵynyń barlyq deńgeılerinde jaǵdaıdyń nasharlaýyna ákeledi", dedi ol Senat Tóraǵasynyń orynbasary Asqar Shákirovtiń tóraǵalyǵymen ótip jatqan Úkimet saǵatynda.
Sonymen qatar mınıstr kodeks sý sharýashylyǵy qurylystaryn jobalaý, salý jáne paıdalanýdyń tehnıkalyq máselelerin rettemeıtindigin atap ótti.
"Bul máseleler ártúrli qurylys normalary jáne erejelerimen, mınıstrlikter men vedomstvolardyń buıryqtarymen retteledi. Osy rette Gıdrotehnıkalyq qurylystarǵa qatysty qaýipsizdik máseleleri arnaıy zańmen rettelýi tıis. Osyny eskere otyryp, 2021 jylǵa jańa Sý kodeksiniń jáne "Gıdrotehnıkalyq qurylystardyń qaýipsizdigi týraly" Zańynyń tujyrymdamalaryn ázirleý josparlanǵan. Budan basqa, sý resýrstaryn ulǵaıtýdyń balama joldaryn paıdalaný, ónerkásipte, aýyl jáne kommýnaldyq sharýashylyqta sýdy paıdalaný tıimdiligin arttyrý, sondaı-aq sý resýrstaryn eldiń sý tapshylyǵy bar óńirlerine jiberý múmkindigin zertteýge baǵyttalǵan ǵylymı blok qalyptastyryldy", dedi Maǵzum Myrzaǵalıev.