Nysandardy zańsyz turǵyzyldy dep taný týraly sot sheshimderi boıynsha elordada 28 ǵımarat súrilýge jatady. Búginde «Nur-Sultan qalalyq orta sapasy jáne baqylaý basqarmasy» memlekettik mekemesi zańsyz salynǵan nysandardy anyqtaý jáne olardy odan ári buzý boıynsha is-sharalar josparyn bekitýde.
«Bul ǵımarattar zańsyz, memlekettik jerge jobalyq-smetalyq qujatsyz jáne memlekettik sáýlet-qurylys baqylaý organdaryna eskertýsiz salynǵan. Tártip buzýshylar ákimshilik jaýapkershilikke tartylyp, nusqaýlyq aldy. Alaıda, buzýshylyqtar erikti túrde joıylǵan joq, soǵan baılanysty sotqa talap aryzdar berildi. Qazirgi ýaqytta sottyń zańdy kúshine engen sheshimderi boıynsha atqarý paraǵy Nur-Sultan ádilet departamentine jiberildi», - dedi qalalyq orta sapasy jáne baqylaý basqarmasy basshysynyń orynbasary Erlan Berdalın.
Aıta keteıik, bıyl basqarma 354 jospardan tys tekserý júrgizip, jiberilgen buzýshylyqtardy joıý týraly 100-den astam buıryq shyǵaryp, 345 hattama jasaǵan.
О́ndiristik, turǵyn úı nemese sharýashylyq nysandaryna jer ýchaskesine tıisti quqyǵy joq zańsyz qurylys salǵany úshin jeke tulǵalarǵa 75 AEK kóleminde aıyppul salynady. Sheneýnikter, shaǵyn bıznes nemese kommersııalyq emes uıymdar úshin - 100 AEK, orta bıznes - 150 AEK, iri kásipkerlik sýbektileri úshin zańsyz ǵımaratty buzýmen nemese onsyz - 700 AEK.