"Qazaqmys" kompanııasy úshin otbasynda kóp balasy bar qyzmetkerlerin baspanamen qamtamasyz etý ıgi dástúrge aınalǵan, dep habarlaıdy Egemen.kz. kompanııanyń baspasóz qyzmetine silteme jasap.
Mysaly, byltyr alpaýyt kásiporynnyń basshylyǵy úıinde tórt jáne odan da kóp bala tárbıelenip jatqan jumysshylaryna 10 páter syıǵa tartqan bolatyn.
Taıaýda atalǵan kompanııa 41 kóp balaly otbasyna jańa páterlerdiń kiltin tabys etti. Bul ıgi baǵdarlama bıznestiń jaýapkershiligin arttyrýdy damytý týraly «Qazaqmys Holdıng» JShS, Eńbek jáne halyqty áleýmettik qorǵaý mınıstrligi jáne Qaraǵandy oblysynyń ákimdigi arasynda qol qoıylǵan úsh jaqty memorandým aıasynda júzege asyryldy.
Baspanamen qamtylǵan otbasynyń biri Syzdyqovtar shańyraǵy boldy. Otaǵasy Qýanysh Syzdyqov «Qazaqmys» kompanııasynda 26 jyldan beri eńbek etip keledi eken. Zaıyby ekeýiniń tárbıesinde bes bala bar.
– Kúni keshege deıin bizge páter syılaıtynyn bilgen joqpyn. Bul jańalyq men úshin úlken tosynsyı boldy. Buǵan deıin biz ata-anamnyń úıinde syǵylysyp turyp keldik. Endi mine, ishinde jıhazy, turmystyq tehnıkanyń bári bar tórt bólmeli páterge ıe boldyq. «Qazaqmys» kompanııasyna aıtar alǵysym sheksiz! – deıdi kenshi qýanyshyn jasyra almaı.
Baqytty jandarǵa páter kiltterin "Qazaqmys" Korporasııasy" JShS Basqarma tóraǵasynyń orynbasary Ádilet Bármenqulov pen "Qazaqmys" Korporasııasy" JShS-niń damý jónindegi dırektory Baqtııar Qyryqpyshev tabys etti.
– Biz kúrdeli kezeńde ózimizdiń qyzmetkerlerimizdi qıyn jaǵdaıda qaldyrmaımyz, olarǵa jan-jaqty kómek kórsetemiz dep aldymyzǵa zor mindetter qoıǵanbyz. Bizdiń kompanııa áleýmettik jaýapkershilikti árdaıym sezinip kelgen, ári qaraı da osy joldan taımaıtyn bolamyz, – deıdi Baqtııar Qyryqpyshev.
Jalpy, bıyldyń ózinde kompanııanyń kópbalaly 102 otbasy ishinde barlyq jaǵdaıy jasalǵan úsh-tórt bólmeli páterlermen jáne bir jer úımen qamtamasyz etildi. Al jyldyń sońyna deıin "Qazaqmys" korporasııasynyń jospary boıynsha Jezqazǵan, Sátbaev qalalary jáne Qaraǵandy men Balqash óńirlerinde turatyn 133 otbasy baspanaly bolady eken.
Qaraǵandy oblysy