Prezıdent janyndaǵy Ortalyq kommýnıkasııalar qyzmetinde jańadan ashylǵan «Halyq arna» telearnasynyń ashylýyna baılanysty baspasóz konferensııasy ótip, oǵan QMDB tóraǵasynyń orynbasary Ershat Ońǵarov, «Halyq arna» kanalynyń bas dırektory Nurjan Darqulov, «Asyl arna» basshysy Muhamedjan Tazabek qatysty.
– Dinı basqarma tól telearna ashýdy byltyrdan beri qolǵa alyp, osy baǵytta birqatar jumys istedi. Endi, mine, sol tabysqa qol jetkizip otyrmyz. Tól arnamyz QMDB qurylǵanyna 30 jyl tolǵan mereıtoı qarsańynda ashylýynyń ózi tarıhı oqıǵa. Allaǵa shúkir, qazir múftııattyń medıa salasyndaǵy áleýeti jyldan-jylǵa jetilip, aqparat keńistiginde ózindik ornyn tapty. Otyz jyl merzim ishinde «Iman» jýrnaly men «Munara» gazeti oqyrmanǵa jol tartty. Búginde Dinı basqarmaǵa qarasty 21 saıt jumys isteıdi. Budan bólek Múftııat janynan ashylǵan «Hıkmet» teleradıostýdııasy 10 jylǵa jýyq óz ónimderin kórermender men tyńdarmandarǵa usynyp keledi. Allaǵa shúkir, búginde ıýtýb jelisindegi dinı baǵytta jasalǵan ónimderdiń 70 paıyzdan astamy Dinı basqarmaǵa tıesili. Jańadan dúnıege kelgen arna tek dinı mazmundaǵy telebaǵdarlamalarmen shektelmeıdi. Efırde tarıhı-tanymdyq, ǵylymı-taǵylymdyq, qazaqy salt pen dástúrge basymdyq beriledi, – dedi baspasóz konferensııasynyń betashar sózin aıtqan QMDB tóraǵasynyń orynbasary Ershat Ońǵarov.
О́z kezeginde sóz tizgini tıgen Muhamedjan Tazabek jańadan dinı arna ashylýyna baılanysty buǵan deıin 10 jyl boıy úzdiksiz dinı-aǵartýshylyq baǵytta jumys atqaryp kelgen «Asyl arna» jabylatynyn, aldaǵy ýaqytta «Tálim TV» atty jańa arna ashyp, qazaq qoǵamynyń ustyny otbasylyq, turmystyq, áleýmettik máselelerdi jaqsy jaǵynan nasıhattaıtynyn aıtty. Sonymen qatar 10 jyl boıy jınaqtalǵan dinı kontentterdi túgeldeı jańa arnaǵa basy bútin ótkizip beretinin jetkizdi.
Jıyn barysynda jańa arnanyń aldaǵy jumys baǵyty, shyǵarmashylyq áleýetiniń mazmuny jaıly baıandaǵan telearna basshysy Nurjan Darqulovtyń sózine qulaq túrsek, «Halyq arnasy» dinı-aǵartýshylyq baǵytta 24 saǵat jumys istep, eki tilde habar taratady. Aqlaq, aqıda, paıǵambarlar jáne ıslam tarıhy máseleleri qamtylady. Qoǵamda ózektiligi zor sharıǵı suraqtarǵa jaýap berý úshin «suraq-jaýap» aıdary qarastyrylǵan. Buǵan QMDB pátýa bóliminiń mamandary tartylady. Sonymen qatar dáristik sıpattaǵy «Quran oqyp úıreneıik», «Namaz oqı bileıik», «Duǵa jattaıyq», t.b. baǵdarlamalar bar. Telearna óz jumysyn qoǵamdaǵy zaıyrly qundylyqtar men sharıǵat talaptaryn qabystyra otyryp júrgizedi. Ekinshiden, qazaq dalasynyń san ǵasyrlyq dinı mádenıeti bar. Sol sebepti arnada din men dástúr sabaqtastyǵyn keńeıtýge baǵyttalǵan kontentterge basymdyq beriledi. Atap aıtqanda, «Atanyń sózi – aqyldyń sózi», «Injý-marjan», «Tulǵalar taǵylymy», «Rýhanı jańǵyrý» qatarly baǵdarlamalar kópshiliktiń kózaıymyna aınalady. Sonymen birge «Múfııat tynysy», «Bólim saǵaty», «Baspasózge sholý», «Halal damý» aıdarymen aqparattyq sıpattaǵy baǵdarlamalar kórsetiledi. Balalarǵa arnalǵan mýltfılm, tárbıelik mándegi «Balalarǵa bazarlyq» jobasy men beınebaıandar da bar.