Kópshilikti alańdatyp otyrǵan koronavırýs indetimen kúres áli tolastaǵan joq. Jambyl oblysynda da qaıta aınalyp soǵýy múmkin qaýipti indettiń ekinshi tolqynyna daıyndyq jumysy jalǵasýda. Máselen, óńirde aýrýhanalardaǵy tósektik oryndar, medısınalyq qyzmetkerler, dári-dármekter, jabdyqtar jáne jeke qorǵanys quraldary sııaqty qajettilikterdiń bári de daıyn eken.
Oblystyq densaýlyq saqtaý basqarmasynyń basshysy Áset Qalıevtiń aıtýynsha, aımaqta 2 530 tósektik oryn jasaqtalǵan bolsa, onyń ishinde 253 tósektik oryn jan saqtaý bólimine tıesili bolyp otyr. Búgingi tańda óńirdegi medısınalyq mekemelerde 253 ókpeni jasandy jeldetý quraly, 706 ottegi ballony, 542 ottegi konsentratory, 1 009 ımpýlstik oksımetr, 19 sıfrly rentgen apparaty, 10 kompıýterlik jáne 7 magnıttik-rezonanstyq tomograftar bar. Jýyrda taǵy da oblysqa 74 ókpeni jasandy jeldetý apparaty, 7 kompıýterlik tomograf, 4 sıfrly rentgen apparaty, 4 ottegi stansasy, sondaı-aq 74 jedel járdem kóligi, 8 jyljymaly medısınalyq keshen jáne 100 kópfýnksıondy tósek jetkiziledi. Sonymen qatar oblystyń bas dárigeri ambýlatorlyq deńgeıde de, stasıonarlyq deńgeıde de dári-dármektiń jetkilikti qory bar ekenin jetkizdi.
Jalpy, Jambyl oblysynda atalǵan jumystarǵa 4 410 medısına qyzmetkerin tartý josparlanyp otyr. Onyń ishinde 882 dáriger, 1 764 orta býyn medısına qyzmetkerleri jáne 1 764 kishi býyn medısına qyzmetkeri bar. Sonymen qatar oblys ákimdigi men S.Asfendııarov atyndaǵy Ulttyq medısınalyq ýnıversıtetiniń arasynda jasalǵan yntymaqtastyq týraly memorandým aıasynda qosymsha 150 maman tartylady. Búgingi tańda óńirde 7 PTR-zerthanasy bar bolsa, jergilikti ákimdik odan ári zerthanalyq zertteýlerdiń tıimdiligin jáne atalǵan zerthanalardyń sany men syıymdylyǵyn arttyrýdy josparlap otyr. Alaıda oblysta koronavırýs indetimen kúreste densaýlyq saqtaý salasy 100 paıyzǵa daıyn bolǵanymen, áli de mobıldi toptardyń jumysy kóńil kónshitpeı tur. Oblys ákimi Berdibek Saparbaev ta muny synǵa alǵan bolatyn.
Shyndyǵynda, koronavırýs ınfeksııasy qaýpi áli tolyǵymen joıylǵan joq. О́kinishke qaraı, kópshilik áli de jıyn-toı ótkizýdi toqtatpaı otyr. Onyń birqatary áshkerelenip te jatyr. Máselen, qazan aıynda Taraz qalasynda mobıldi toptar 3 033 nysandy tekserip, karantındik rejimdi buzǵany úshin 18 hattama ǵana toltyrypty. Sol sııaqty, óńirdegi Sarysý, Moıynqum, Merki, Jýaly, Qordaı aýdandaryndaǵy mobıldi toptardyń da jumysy oıdaǵydaı emes.
Qazirgi tańda memleket tarapynan karantın talaptaryn qatań saqtaý týraly kópshilikke jıi eskertilýde. Búginde ınfeksııalyq stasıonardan 4 090 azamat saýyǵyp shyqqan. Bıyl 4 qarashaǵa deıin Jambyl oblysynyń aýmaǵynda jalpy koronavırýs indetin juqtyrýdyń 4 199 jaǵdaıy tirkelip, 100 myń turǵynǵa shaqqanda aýrýshańdyq kórsetkishi 363,1-di quraǵan. Atalǵan ýaqyt aralyǵynda pnevmonııanyń 137 jaǵdaıy anyqtalypty. Oblystyq densaýlyq saqtaý basqarmasynyń málimetinshe, olardyń ishinde 1 833 naýqas sımptomdy, al 2366 naýqas sımptomsyz bolyp shyqqan. Qazirgi tańda ınfeksııalyq stasıonarda 32 naýqas em qabyldaýda. Onyń 21-niń jaǵdaıy ortasha bolsa, ókinishke qaraı, 11 naýqastyń jaǵdaıy aýyr dárejede bolyp otyr. Búginde qaýipti indet juqtyrǵandardyń densaýlyǵy jiti nazarǵa alynǵan.
Bir qýanarlyǵy, Jambyl oblysynyń Bas memlekettik sanıtarlyq dárigeri Saltanat Alıbaevanyń 5 qarashadaǵy №40 «Jambyl oblysy Bas memlekettik sanıtarlyq dárigeriniń qaýlysyna ózgerister men tolyqtyrýlar engizý týraly» qaýlysyna sáıkes, oblys aýmaǵynda keıbir karantın talaptary jeńildetildi. Sondaı-aq kúsheıtilgen sanıtarlyq-dezınfeksııalyq, maskalyq jáne áleýmettik qashyqtyq talaptaryn saqtaı otyryp, óńirdegi teatrlar men meshitterdiń jumys isteýine ruqsat etildi. Sonymen qatar aldaǵy ekinshi toqsannan bastap, qalalyq jáne aýyldyq aımaqtaǵy kontıngenti 300 oqýshyǵa deıingi mektepter dástúrli oqý formatyna kóshiriletin boldy. Alaıda árbir synyptardaǵy balalardyń sany 15-ten aspaýy kerek. Jalpy bilim beretin mektepterde 1-5 synyptar, al halyqaralyq mektepterde 7-synypqa deıin kezekshi klastarda oqytýǵa ruqsat etilgen.
Jambyl oblysy