Qostanaı oblysynda bıyl Áýlıekól, Altynsarın, Fedorov aýdandaryna qarasty birqatar eldi mekenge gaz qubyry tartylyp, turǵyndar alty aı qys kómir tasyp, pesh jaǵyp, kúl shyǵarý sııaqty kúıbiń turmystyń kúndelikti beınetinen aryldy. Kógildir otyn jyl sońyna deıin taǵy birneshe aýylǵa jetedi.
Nur Otan partııasy Qostanaı oblystyq fılıaly tóraǵasynyń birinshi orynbasary Eldar Kúzenbaev gaz qubyry tartylatyn aýyl qatary jyl saıyn eselene beretinin jetkizip, aımaqtyń áleýmettik ınfraqurylymyn damytý maqsatynda júzege asyrylyp jatqan basqa da ıgi sharalar jóninde aıtty.
Ásirese oblys halqynyń ómir sapasyn jan-jaqty jaqsartý, turǵyndardy taza aýyz sý, baspana jáne sapaly jolmen qamtamasyz etý, áleýmettik ınfraqurylymdy jańartý máseleleri ózekti bolyp tur.
– Jahandyq koronavırýs indeti oblysymyzdyń ekonomıkalyq jaǵdaıyna keri áser etip jatqany jasyryn emes. Alaıda memleket tarapynan azamattardy qoldaýǵa arnalǵan daǵdarysqa qarsy sharalar ázirlenip, kún saıyn jol-kólik ınfraqurylymyn, turǵyn úı-kommýnaldyq sharýashylyǵyn jańǵyrtýǵa, sondaı-aq salaýatty ekologııalyq jaǵdaıdy saqtaýǵa baǵyttalǵan memlekettik baǵdarlamalar sátti júzege asyrylyp jatyr, – dedi E.Kúzenbaev.
Oblystyq fılıal tóraǵasy orynbasarynyń aıtýynsha, búginde kólik ınfraqurylymyn odan ári damytý maqsatynda avtomobıl joldarynyń sapasyn arttyrý jáne 2025 jylǵa qaraı sapaly joldardyń úlesin 95 paıyzǵa jetkizý kózdelip otyr. Buǵan qosa 300-den artyq adam turatyn aýyldarda ortalyqtandyrylǵan sý qubyry tartylady. 200-den 300-ge deıin nemese odan da kóp turǵyny bar eldi mekenderge kelisimmen sý tazartý jáne sý taratý pýnktteri salynady. Sondaı-aq halyq sany 200 adamǵa deıingi sýy sapaly qudyǵy joq shaǵyn aýyldarǵa ortalyqtandyrylǵan sý qubyry tartylǵansha, aýyz sý syrttan tasymaldanady.
Búginde jergilikti atqarýshy bıliktiń kúshimen oblystyń 11 eldi mekeninde sýmen jabdyqtaý jelilerin qaıta qurý, 93 aýylda sýmen jabdyqtaý nysandaryn salý josparlanýda. Nátıjesinde, aýylda turatyn 98,3 myń turǵynnyń sapaly aýyz sýǵa qol jetkizýine múmkindik týady.
Fılıal tóraǵasynyń orynbasary memlekettik turǵyn úı baǵdarlamalaryn iske asyrý barysyna da toqtalyp ótti. Aıtýynsha, byltyr «Nurly jer», «7-20-25» baǵdarlamalary sheńberinde 1 580 otbasy baspanaly bolǵan.
– Azamattardyń áleýmettik ál-aýqaty – aımaqtyń turaqty áleýmettik-ekonomıkalyq damýynyń kórsetkishi. Biz bilim berý, densaýlyq saqtaý, sport jáne áleýmettik qyzmetter salasyndaǵy sapaly qyzmetterge qoljetimdilikti qamtamasyz etý arqyly turǵyndardyń turmysyn jaqsartamyz. Jergilikti bılik Qostanaı oblysy halqynyń talap-tilekterin qanaǵattandyrý maqsatynda qoldan kelgenshe múmkin sharalardyń barlyǵyn tıimdi júzege asyryp keledi, – dedi E.Kúzenbaev.
Qostanaı oblysy