Jýyrda Úkimet qaýlysy boıynsha «Jambyl temir joly» bólimshesine qarasty «Lýgovaıa stansııasy» «Túrksib» stansasy bolyp ózgertildi. Bul sheshimdi temirjolshylar kezinde atalǵan magıstraldy damytý jolynda eńbek etken azamattardyń eńbegi men stansa tarıhyna qurmet dep baǵalaýda.
Osy kúnge deıin «Lýgovaıa stansasy» atalyp kelgen beketke Túrksibtiń 90 jyldyǵyna oraı «Túrksib» ataýy qaıtarylyp otyr. Osydan týra 90 jyl buryn Túrksib boıynsha ótpeli jumysshylardyń qozǵalysy bastalǵan. Jańa salynǵan bolat jol arqyly Almaty ýezdik qalasy respýblıkanyń ákimshilik jáne mádenı ortalyǵyna aınaldy. Sonymen qatar Jańasemeı, Charsk, Aqtoǵaı, Lepsi, Mataı, Saryózek, Shý, Aıagóz jáne Otar sııaqty kóptegen jańa qalalar men stansalar paıda boldy.
Tarıhı derekter boıynsha 1927 jyly 21 qarasha kúni osy Lýgovaıa stansasynda temir joldyń alǵashqy relsteri salynǵan. Al atalǵan stansa 1930 jyly paıdalanýǵa berilgen. Osy jerde sol kezdegi Halyq Komıssarlary Keńesi tóraǵasynyń orynbasary, kórnekti Alash qaıratkeri Turar Rysqulovtyń qatysýymen qurylys alańynyń resmı ashylýy ótken. Túrksibtiń bolat magıstrali 1 500 shaqyrymǵa deıin sozylǵan. Sol 1930 jyly Túrksib relsteri qosylyp, ótpeli qozǵalys úshin jol ashyldy. Lýgovoı stansasynan sol kezdegi Jambyl, Shý jáne Bishkek qalalaryna poıyzdar júrdi. Bul kúnde aty ańyzǵa aınalǵan magıstral sol kezde ekonomıkanyń damýynda mańyzdy ról atqaryp qana qoımaı, úlken aýmaqtyń tabıǵı resýrstaryn ıgerýge, ónerkásip jáne aýylsharýashylyq áleýetin iske asyrýǵa da múmkindik aldy. Qarapaıym halyqtyń erliginiń nátıjesinde dúnıege kelgen Túrksibti el «Jańa ómir joly» dep atady. Keıin magıstral boıynda qalalar men jumysshy poselkeleri paıda boldy. Sol kezeńde búgingi T.Rysqulov aýdanynyń aýmaǵyna qaraıtyn Lýgovoı aýyly da quryldy.
Búginde Túrksib stansasy tek Qazaqstannyń ǵana emes, Ortalyq Azııanyń da barlyq elderiniń ekonomıkasynda mańyzdy oryn alady. Tasymaldy Qytaıdan bastap, Reseı, Ortalyq Azııa, Taıaý Shyǵys elderi arqyly jáne Eýropaǵa deıingi biryńǵaı Jibek jolyna biriktiretin ortalyqqa aınaldy. Lýgovoı aýyldyq okrýginiń ákimi Murat Sybanovtyń aıtýynsha, stansada búginde 10 385 adam turady. Temir jol salynǵanda qurylǵan aýyldyń turǵyndary da stansanyń «Túrksib» dep atalýyn durys kórip jatyr eken. Al Túrksib stansasynyń basshysy Tımýr Qýanyshuly bul jerden kún saıyn 35 jolaýshylar jáne júk tasymaldaýshy poıyz ótetinin aıtty. Sondaı-aq atalǵan stansa Qyrǵyzstannan 5 poıyzdy qabyldap alyp, 5 poıyzdy jiberedi eken.
Jambyl oblysy