Belgili qarjy sarapshysy, «Balalar men jasóspirimderge arnalǵan qarjylyq saýat» kýrsynyń avtory Anel Shákenova Halyqaralyq Investorlar aptalyǵynyń spıkeri retinde otbasylyq qarajat týraly mańyzdy aqparatpen bólisti. Bul týraly «Astana» halyqaralyq qarjy ortalyǵy habarlady.
Anel Shákenovanyń aıtýynsha, búginde tańda balalar úshin aqsha taqyryby óte qyzyqty. Qarjyger qazaqstandyq otbasylarda aqsha jáne qarajat týraly aqparat kóp talqylanbaıtynyn aıtady. Alaıda balalar eresekter arasynda jıi talqylanatyn dollar baǵamy men aqshanyń qunsyzdanýy týraly bilgisi keledi.
– Sondyqtan ata-analar úıde ul-qyzdaryna qarajat, ınflıasııa jáne emosıonaldy saýdanyń ne ekenin aıtyp, túsindirip otyrǵany durys, – dedi A.Shákenova.
Qarjylyq saýat kýrsynyń avtory óz otbasynda qarajat jaratýdyń is júzinde qalaı oryndalatynyn túsindirdi. Ata-ana retinde ol jubaıymen úıdegi sharýalar men oqýyn jaqsy oqyǵany úshin balalaryna eńbekaqy berip otyratynyn jetkizdi. Buǵan qosa olımpıada men túrli jarystarǵa qatysyp júldeger atanǵany úshin, sondaı-aq bir toqsanda úzdikter qatarynan oryn alǵany úshin balalar qarjylaı bonýs alady eken. Ereksheligi sol, kýrs avtory joldasy ekeýi eńbekaqy men bonýsty balalarynyń qaıda jumsaǵany týraly suramaıdy. Iаǵnı qarajatty ıgerý quqyǵy tolyqtaı balalardyń óz erkinde. Mamannyń sózine súıensek, osylaısha jas býynyń qarjylyq jaýapkershiligi qalyptasady.
Al olardy eresek ómirge daıyndaý retinde bızneske nemese jumysqa tartý da balaǵa úlken ári mańyzdy tájirıbe bolady.
– Úlken balalarymdy bıznesimmen tanystyrý eki jaqqa da paıdasyn tıgizdi, –dedi qarjy sarapshysy.
Mamannyń aıtýynsha, jastardyń tehnologııa men shet tilin tez meńgerý qabileti olarǵa kóp artyqshylyq beredi. Osylaısha, kishkentaıynan jańa kásipti kreatıvti baǵytta damytýǵa bolatynyn, alaıda qarajat jaǵynda turaqsyzdyq bolýy múmkin ekenine olar erte bastan kóz jetkizedi.
Al belgili bir qyzmetke ornalasý qarajat jaǵynan qolaıly bolǵanymen, tulǵalyq qabiletti tanytýda kúrdeli bolyp keletinin jiti túsinetin bolady dedi kýrs avtory.
Qarjygerdiń tájirıbesi kórsetkendeı balalarǵa eńbekaqy bólý, olardy qas qaqpaı baqylap otyrýdy toqtatý kómektiń bir tetigi bolsa, bıznespen tanystyrý, ıá bolmasa jumys barysyn kórsetý ómirge daıyndyq jolynyń taǵy bir baspaldaǵy bolatyny kúmánsiz.