Erterekte, Jetisý óńirinde Japalaq pen Jumanaı degen aǵaıyndy adamdar ómir súripti. Úlkeni Japalaq elge tutqa, aýylǵa aıbar, jatqa syıly, jaqynǵa qaıyrymdy, aǵaıynǵa qamqor jan eken. Bir kúnderi Japalaq jurttyń jan baǵyp otyrǵan jaıylymyn tartyp almaqshy bolyp kelgen aq patshanyń ákimger sheneýnigine qamshy úıirip, ony qorǵaımyn dep myltyq ala umtylǵan soldatty sabap, ol beıbaq ólip ketip, basy daýǵa qalady.
Qysqasy, keshikpeı «Japalaqty ustaý úshin Qapal ýezinen ásker kele jatyr» degen habar jetedi. Sonda inisi Jumanaı kelip: «Myna jaý seni ustamaı tynym tappaıtyny anyq boldy. Sen ketseń bar qıyndyq eldiń basyna túsedi, men ketsem bir shańyraqqa ǵana túsedi. Eger uıǵarsań «Japalaq degen men» dep soldattyń aldynan ózim shyǵaıyn, tiri bolsam bir kelermin, ólsem, urpaǵym sizge amanat» depti.
Patsha áskeriniń qolyna óz erkimen túsken Jumanaı sol ketkennen Sibirge aıdalyp, aqyry dám-tuzy taýsylyp, jat jerden topyraq buıyrypty.
Japalaq bolsa inisiniń amanatyn buljytpaı oryndap, jalǵyz ulyn hannyń balasyndaı etip asyrap, er jetkende el basqartyp, tipti bolys ta qylǵan eken. Qazir osy áýletten taraǵan urpaq bir qaýym el. Shyǵys Qazaqstan oblysy, Úrjar aýdanynda tamyr jaıyp, ósip-ónýde.