Premer-Mınıstrdiń orynbasary Roman Sklıar ákim Ǵalı Esqalıevpen birge Memleket basshysynyń Joldaýynyń iske asyrylý barysymen tanysty, onyń ishinde "Nurly jer" baǵdarlamasy sheńberinde strategııalyq jáne ónerkásiptik maqsattaǵy birqatar obektilerdi, salynyp jatqan áleýmettik nysandardy tekserdi. Barlyq qajetti jumystardyń sapaly oryndalýyn jáne ýaqytyly aıaqtalýyn qamtamasyz etý boıynsha mindetter júktedi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Osylaısha, R. Sklıar Oral qalasynyń soltústik-shyǵys bóliginde jańa shaǵyn aýdannyń salyný barysyn, sondaı-aq Terekti aýdanynyń Tuqpaı aýylyndaǵy alty páterli 20 turǵyn úıdiń qurylysyn tekserdi. Bul obektiler "Nurly jer" baǵdarlamasy boıynsha salynýda, olardy aǵymdaǵy jyly aıaqtaý josparlanyp otyr.
"Batys sý arnasy" JShS aralaý barysynda sýmen qamtamasyz etý máseleleri qaraldy. Oblys ortalyǵynda qosymsha uńǵymalardy burǵylaý arqyly beriletin sý kólemin ulǵaıtý josparlanýda, bul rette apattardyń aldyn alý maqsatynda qysym málimetterin berilgishter ornatylady. Podstepnoe aýylynda buqaralyq sportty damytý barysy týraly baıandaldy. Aýdany 1000 sh.m. dene shynyqtyrý-saýyqtyrý kesheniniń qurylysy aǵymdaǵy jyldyń jeltoqsan aıynda aıaqtalady. Oblys boıynsha jalpy sany 26 DShS keshenin salý josparlanǵan. Búgingi tańda bıýdjet jáne jeke ınvestısııa esebinen 14 keshen salyndy.
Úkimettik delegasııa sonymen qatar "Zenıt" Oral zaýyty" AQ, "Ýralskagroremmash" AQ, "Gıdroprıbor" ǴZI, "Kýbleı" JShS-inde boldy.
Sapar qorytyndysy boıynsha Roman Sklıar óńir halqy úshin júrgizilip jatqan jumystardyń mańyzdylyǵyn atap ótip, oblys basshylyǵyna olardyń oryndalýyn pármendi baqylaýdy qamtamasyz etýdi tapsyrdy.