• RUB:
    6.68
  • USD:
    520.93
  • EUR:
    609.07
Basty saıtqa ótý
Qazaqstan 16 Qarasha, 2020

Eńbekti qorǵaý – adamdy qoldaý

552 ret
kórsetildi

Bizdiń elimizde adamdardyń eńbegin qorǵaıtyn, eńbek týraly zańnamalardyń buzylmaýyn baqylaıtyn, eńbekaqynyń ýaqtyly tólenýin talap ete alatyn, ujymdyq kelisimsharttardyń qarapaıym eńbek adamynyń múddesin qoldaýyna monıtorıng jasaıtyn, kásibı naýqastar men óndiristik jaraqattar boıynsha saraptar jasap, kimniń kináli ekenin anyqtaıtyn jáne eńbek adamyn qoldaıtyn qoǵamdyq negizdegi kásipodaqtarmen qatar arnaıy memlekettik qyzmet te bar. Onyń resmı ataýy Memlekettik eńbek ınspeksııasy.

Bıylǵy qazan aıyna deıin Soltústik Qazaqstan oblysynda osy qyzmettiń basshysy bolyp Qaırat Pishenbaev degen bilikti azamat jumys istegen edi. Ol Ýálıhanov aýdanynyń ákimi bolyp aýysqan soń qazir onyń ornyna Marat Omarov taǵaıyndaldy.

Mine, osy qyzmet jyl basynan beri eńbek zańnamasynyń saqtalýy boıynsha 187 tekseris júrgizip, 584 buzýshylyq anyqtaǵan eken. Sonyń ishinde 142   mln teńge eńbekaqynyń ýaqtyly tólenbegenin anyqtaǵan.

Osy buzýshylyqtar úshin 43 laýazymdy tulǵa ákimshilik jaýapkershilikke tartylǵan. Al olarǵa salynǵan aıyppuldyń kólemi 8 mln. teńgedeı bolǵan. Eńbek qaýipsizdigi men eńbek adamyn qorǵaý boıynsha júrgizilgen 87 tekseris eńbekti qorǵaý boıynsha 123, eńbekqaýipsizdigi boıynsha 52 buzýshylyq tapqan. Jyl basynan beri oblys kásiporyndarynda 32 baqytsyz jaǵdaılar bolǵan. Solardyń kesirinen 35 adam japa shekken. Sonyń altaýy qaza tapqan.

Mundaı jaǵdaılar aýylsharýashylyǵy kásiporyndarynda kóbirek kezdesedi. Máselen, bıylǵy kúzde Taıynsha aýdanyndaǵy «Astyq Stem» JShS traktorshysy súrlem basyp júrgende «Kıroves» traktoryn aýdaryp alǵan. Mehanızatordyń ózi janshylǵan kabınanyń ishinde qalyp, alǵan jaraqattan sol jerde kóz jumǵan.

Osy oqıǵa boıynsha Memlekettik eńbek ınspeksııasy muqııat tekseris júrgizip, aıypty mehanızatordyń ózi men jumys berýshi ekenin anyqtady. Marqumnyń kámeletke tolmaǵan 4 balasyna saqtandyrý kompanııasynan ótemaqy tólenedi. Budan basqa da barlyq jaǵdaılar eńbek zańnamalaryna sáıkes tekserilgen. Osyǵan baılanysty 66 jumys berýshige mindetti túrde oryndalýǵa tıisti nusqamalar  berilgen.

О́ndiristik apattar men jaraqattardyń aldyn alý úshin memlekettik ınspeksııa apta saıyn eńbek tártibin saqtaý jóninde oblys kásiporyndary ókilderiniń qatysýymen semınar-keńester ótkizip turady.

Jýyrda osy Eńbek ınspeksııasy qyzmeti bastyǵynyń orynbasary M.Sabaǵatov eńbekaqy tóleý boıynsha zańnamalardyń saqtalýyna jasalǵan monıtorıngtiń nátıjeleri týraly aıtyp berdi. Tekseris 17 kásiporynda júrgizilgen. Osylarda jumys isteıtin 1852 adamǵa kásiporyndar 200 mln. teńgeden artyq eńbekaqy bereshek bolǵan. Osyǵan baılanysty jumys berýshilerge oryndalýy mindetti nusqamalar berilgen. Sonymen birge olarǵa 3,1 mln. teńgeniń aıyppuly salynǵan.

Eńbek ınspeksııasyna túsip jatatyn aryz-shaǵymdar da kóp. Osy jyldyń 9 aıynda ǵana olardyń sany 646 bolǵan. Sonyń 90 paıyzy eńbek qatynastaryna baılanysty shaǵymdar. Eńbek qaýipsizdigi týraly jasalatyn aryzdar az ǵana.

Oblysta jaman indetke baılanysty shekteý sharalary engizilgennen beri aryz-shaǵymdar onlaın- rejimde nemese elektrondyq nusqa túrinde qabyldanatyn boldy. Shaǵymnyń úlgileri ınspeksııanyń resmı saıtynda kórsetilgen.

Soltústik Qazaqstan oblysy