Áýe qorǵanysy kúshteriniń Áskerı ınstıtýtynda aty ańyzǵa aınalǵan ushqysh, eki márte Keńes Odaǵynyń Batyry Talǵat Bıgeldınovty eske alý kúni ótti. Bul týraly Qorǵanys mınıstrligi habarlady.
Soǵys jyldary ol áskerı tapsyrmalarmen 305 ret áýege kóterilgen. Talǵat Bıgeldınov áýe shaıqasynda fashıstik «messershmıtti» jeńgen alǵashqy ushqysh boldy. Il-2 shabýyldaýshy ushaǵynda ol jeti ushaqty atyp túsirip, jaýdyń ondaǵan tankterin, zeńbirekterin jáne basqa da tehnıkalarynyń kózin joıdy. Erligi men ushý sheberligi úshin aǵa leıtenant Talǵat Bıgeldınov eki ret Keńes Odaǵynyń Batyry ataǵyna ıe boldy.
«Jas urpaq qazaqstandyq jaýyngerlerdiń erlikterin bilýi kerek. Olarǵa qarap boı túzeıtindeı biz kýrsanttardy jaýapkershilikke, sertke adal bolýǵa úıretip, naǵyz otan qorǵaýshylardy tárbıeleımiz», – dedi Áýe qorǵanysy kúshteri Áskerı ınstıtýty bastyǵynyń mindetin ýaqytsha atqarýshy polkovnık Asqar Izbasov.
Talǵat Bıgeldınov 2014 jyly 10 qarashada dúnıeden ozdy. Kózi tirisinde ol jastarmen jıi kezdesetin. Ár kezdesýde ol jastarǵa patrıot, dostyqqa berik bolýdy, ata-babalarymyzdyń jaýyngerlik dástúrlerin arttyrý qajet ekenin aıtatyn.
JOO úshin ataqty ushqysh Talǵat Jaqypbekuly Bıgeldınovty eske alý kúnin atap ótý dástúrge aınalǵan. Kýrsanttar osyndaı batyrdyń esimi berilgen ınstıtýtta oqyǵanyn maqtan tutady.
JOO-da kýrsanttar Talǵat Bıgeldınovtyń tanymal shyǵarmalarymen tanysady. Atap aıtqanda «Ilder shabýyldaıdy», «305-shi reıd» jáne «Máńgilik shyńynda». Bul kitaptar ınstıtýt kitaphanasynyń qorynda bar.
JOO qolbasshylyǵy men kýrsanttar batyrdyń eskertkishine gúl shoqtaryn qoıyp, bir mınýt únsizdik jarııalady.