Sapaly ınternetke qol jetkizýdiń qýanyshy

Jýyrda «Qazaqtelekom» kompanııasy «Sıfrly Qazaq­stan» baǵdarlamasy boıynsha Toqtarov aýylyna talshyqty-optıkalyq baılanys jelilerin (TOBJ) tartý arqyly turǵyn­darǵa keń jolaqty ınternetke qosylý múmkindigin jasady.

Toqtarov aýyly oblys or­­­talyǵy Qostanaı qalasy­nan 250 shaqyrym jerde or­nalasqan. Aýylda 700-den as­tam halyq turady.

– Meniń qyzym úshinshi synypta oqıdy. Úıimizge jyldam ınternet engeli beri qazaq jáne aǵylshyn tilderin onlaın úı­renýdi bastady. Endi qajetti aq­paratty kompıýterge de, plan­shet, smartfon sııaqty gadjet­terge de ońaı júkteı alatyn boldyq. Sonymen qatar ınternet je­ke kásipker retinde maǵan sha­rýashylyq máselelerdi sheshý­de kómektesedi. Aıtalyq, paı­daly keńester – tigin, aspaz­dyq reseptter, mysaly qazir qystyń qamymen túrli azyq-túlik saqtaý tásilderin ınternetten qarap tanysyp jatyrmyn. Meniń oıymsha, ınternet bolsa kez kelgen adam ózin-ózi damytýǵa, qosymsha bilim alý­ǵa mol múmkindigi ashylady, – deıdi Toqtarov aýylynyń tur­ǵyny Elena Abramova.

Bul aýyldaǵy shaǵyn kom­plektili mektepte nebári 47 oqýshy bilim alady, búgingi tań­da munda sabaq ádettegideı bilim ordasynda ótip jatyr. Aýylǵa júrgizilgen talshyqty-op­tıkalyq baılanys jelileri eń aldymen bilim mekemesine qosylǵan edi.

Mektep dırektory Ardaq Álmuhamedovanyń aıtýynsha, aýyldyń optıkalyq talshyqqa qosylýy oqý úderisine de, muǵa­lim­derdiń biliktiligin arttyrýǵa da oń áserin tıgizdi.

– Buryn bilim berý júıe­sindegi ınternet-resýrstardy ashý qıyn bolatyn, bul aıtar­lyqtaı qolaısyzdyqtar týdyratyn. Qazir mundaı kedergiler joq, muǵalimder sabaqqa da­ıyndalady, sonymen qatar bi­liktiligin arttyrýmen aınalysady. Olar endi biliktilikti arttyrý ınstıtýtynyń veb-saıtynan óz tájirıbelerimen bólisken pedagogterdiń beıne­rolıkterin ońaı júkteı alady, – deıdi mektep dırektory.

Sonymen qatar mektep dı­rek­tory aıtqandaı, jo­ǵarǵy oqý oryndary qashyq­tan bilim alýǵa kóshkende óz aýyl­daryna oralǵan stýdentter osy­ǵan deıin úıdegi ınternet álsiz bolǵandyqtan, oqý oryndarynda berilgen tapsyrmalardy oryndaý úshin mekteptiń kompıýterine kelip otyrady eken. Biraq búgingi tańda mundaı qajettilik joq. Sebebi júırik ınternet aýyldaǵy árbir úıge jetti. Endi stýdentter úıden shyqpaı-aq tapsyrmalaryn júktep, oryndaǵan nátıjelerin jibere alady.

Aıta keteıik, Toqtarov aýy­­lynyń halqy buǵan deıin mo­bıldi ınternetti qolda­natyn. Endi osy aımaqqa tartyl­ǵan talshyqty-optıkalyq baılanys jelisiniń negizinde aýyl­da má­limet taratý toraby montajdalyp, sol arqyly keń jolaqty ınternet árbir turǵyn úıge jetti.

– TOBJ jobasy boıynsha Qostanaı oblysynyń aýyl­dyq eldi mekenderinde 937 shaqy­rymnan astam optıkalyq baılanys jelileri salyndy. Bul jańa ınfraqurylym aýyldaǵy jelini odan ári jańǵyrtýǵa negiz bolady. Uıaly baılanys operatorlarymen birlesken «250+» jobasy aıasynda uıaly baılanys operatorlarynyń bazalyq stansalaryn salý josparlanýda. Nátıjesinde, Qostanaı oblysyndaǵy 62 aýyldyq eldi meken turǵyndary keń jolaqty mobıldi ınternetpen qam­tamasyz etiledi, – deıdi «Qazaq­telekom» AQ Soltústik óńirlik telekommýnıkasııa dı­rek­sııasynyń telekommýnı­kasııa jelilerin damytý jónin­degi dırektor orynbasary Ol­jas Tataev.  

Aıta keteıik, búgingi kúnge deıin «Qazaqtelekom» Qostanaı oblysynyń 39 aýyldyq eldi mekenine «optıka» ornatýdy aıaqtap, 133 memlekettik meke­meni joǵary jyldamdyqty ın­ternetke qosqan.

Eske salaıyq, ulttyq operator talshyqty-optıkalyq baılanys jelisi  tehnologııasyn qoldana otyryp, aýyldyq eldi mekenderge keń jolaqty ınternet jetkizý boıynsha aýqymdy ınvestısııalyq jobany aıaqtaýǵa jaqyn. Jalpy, jyl sońyna deıin el boıynsha 14,5 myń shaqyrym jeli salynyp, 828 aýylǵa optıka tartylady, 2,5 myń memlekettik mekeme men bıýdjettik uıym joǵary jyldamdyqty ınternetke qosylady.