Shymkentke sońǵy bir aıdan asa ýaqyt ishinde shetelden ushyp kelgen 75 qazaqstandyqtyń ekeýinen juqpaly ınfeksııa anyqtalyp, gospıtalǵa jatqyzylǵan. Al vırýs anyqtalǵan 7 balanyń bireýi aýrýdy Saryaǵashtaǵy shıpajaıda demalyp kelgen ájesinen juqtyrǵan. Aıta keterligi, 7 balada da aýrý sımptomsyz bolǵan.
Shymkent qalalyq densaýlyq saqtaý basqarmasynyń basshysy Baqytjan Pozılovtiń derekteri boıynsha, aýrýhanalarda naýqastarǵa arnalǵan 1 060 tósektik orynnyń 868-i bos tur. Medısınalyq mekemelerde 192 naýqas em qabyldaýda. Qazirgi tańda qala turǵyndaryna qyzmet kórsetetin 9 PTR-zerthanasy jumys isteýde. Olar kúnine 3 550 test jasaýǵa qaýqarly. Osy ýaqytqa deıin 130 myńǵa jýyq azamat synama jasatqan.
Epıdemııanyń ekinshi tolqynyna daıyndyq kezinde reanımasııalyq tósekterdi jabdyqtaý maqsatynda 314 fýnksıonaldy kereýet, 381 dozator, 266 reanımasııalyq monıtor jáne 381 medısınalyq sorǵysh qondyrǵy satyp alynǵan. Basqarma basshysynyń aıtýyna qaraǵanda, sońǵy kezderi koronavırýs ınfeksııasy dıagnozy qoıylǵandardyń barlyǵy – respýblıkanyń ózge qalalarynda vahtalyq jumys isteıtin azamattar. Olardan vırýs kezekti jumys saparyna attanardyń aldynda tapsyrǵan PTR-testtiń qorytyndysy kezinde anyqtalyp otyr. Qazirgi tańda naýqastar tıisti em-domyn alýda.
«Pandemııa órship turǵan ýaqytta, ıaǵnı jaz maýsymynda kovıd jáne pnevmonııaǵa shaldyqqan júkti áıelderge medısınalyq kómek kórsetýde qıyndyqtarǵa tap boldyq. Sebebi qalalyq ınfeksııalyq gospıtalda oryn jetispeýshiligi týyndady, al perınataldyq ortalyqtar vırýs juqtyrǵan júkti pasıentterdi qabyldaı almady. О́kinishke qaraı, osyndaı problemalardyń saldarynan 12 aıaǵy aýyr áıel kóz jumdy. Mundaı qatelikterge jol bermes úshin qalalyq juqpaly aýrýlar ortalyǵynda júkti áıelderge arnalǵan operasııalyq blok ázirlep qoıdyq. Jaqynda ǵana onda kovıdke kúdikti aı-kúni jetip qalǵan júkti emdelýshige dárigerler kesar tiligin jasap, aman-esen bosandyryp aldy. Dúnıege kelgen qyz bala dereý qalalyq balalar aýrýhanasyna oqshaýlandy. Sábıden vırýs anyqtalǵan joq», deıdi B.Pozılov.
Koronavırýs jáne pnevmonııamen aýyrǵandar ońaltýdy qajet etedi. Osy oraıda úshinshi megapolıste koronavırýspen aýyryp, emdelip shyqqan naýqastarǵa ońaltý sharalary jekemenshik klınıkalarda júrgizilýde. Olardyń barlyǵy qajetti apparattarmen, onyń ishinde ókpeniń jumysyn qalpyna keltiretin eń basty qural – vıbrolangpen jabdyqtalǵan. Aldaǵy ýaqytta indetten aıyqqan jandardy saýyqtyrý úshin arnaıy ońaltý ortalyǵyn ashý josparlanyp otyr. Ol úshin qaladan qurylys nysany tańdalýda. Sondaı-aq indetpen kúres jumystaryna mamandardy jumyldyrmas buryn olardyń jas shamasyna, densaýlyq jaǵdaıyna da kóńil bólinýde. Eger medısına qyzmetkeriniń jasy úlken nemese qosymsha aýrýlary bar bolatyn bolsa, olar naýqastarmen tikeleı qarym-qatynasqa túspeıtin pasıentterdi dıstansııalyq túrde baqylaý, qońyraý shalý sekildi ózge sharalarǵa jumyldyrylýda. Maman tapshylyǵy da oń sheshimin taýyp keledi. Bul oraıda, basqarma basshysy jyl basynan beri 14 157 medısına qyzmetkeri koronavırýstyq ınfeksııany emdeý boıynsha oqytýdan ótkenin aıtady. Sondaı-aq dárigerler úshin semınarlar jıi-jıi ótkizilýde.
«Búginde reanımatologterdiń jetispeýshiligin sheshý maqsatynda 40 rezıdent pen 39 ftızıatr-pýlmanolog reanımasııalyq alǵashqy kómek kórsetý boıynsha oqytylýda. Árıne, sannan góri mamannyń sapasy, biliktiligi asa mańyzdy. Biz osy maqsatta joǵary oqý oryndarynda bilim alyp jatqan 40 rezıdenttiń oqý úlgerimin baqylap otyrmyz. Bilim sapasy joǵary bolýyn jiti nazarda ustaýdamyz», deıdi basqarma basshysy.
Indetten saqtaný boıynsha túsindirý jumystary da jan-jaqty júrgizilýde. Mysaly, qaladaǵy 36 memlekettik jáne 22 jekemenshik medısınalyq uıym resmı paraqshalary arqyly aptasyna úsh ret koronavırýstan saqtaný joldaryn tikeleı efırde túsindirgen. Jalpy, búginge deıin osyndaı 90-ǵa jýyq tikeleı efır uıymdastyrylypty.
Shymkent